Lafaek News—Deskonfia manorin ida iha ensinu superior Universidade Nasional Timor Lorosa’e, fakuldade siensia social, departamentu polítika publiku, prátika asedu sexual hasoru estudante no obrigadu estudante ne’e tenke ba toba iha otél.
Hahalok ne’e shoke tebes estudante sira nia tensaun hodi realiza kedan konferensia imprensa iha kampus laran hodi kondena hahalok immoral hosi dosente ne’e rasik hasoru estudante feto ida iha fakuldade refere.
Iha konferensia imprensa Agustinho da Costa hanesan portavos, nia parte kondena tebes hahalok predator sexual ne’ebe dosente inisial MB halo hasoru estudante feto Sira, tan ne’e alumni sira husu ba magnífiku reitor atu demite dosente ne’e husi nia kargu hodi prosesa tuir dalan legal.
“Ho aktus dosente nian iha leten mak ami estudante ativu no alumni husu atu, demite imediatamente husi nia kargu nudar dosente, husu Universidade atu prosesa tuir dalan legal ami fo ultimatu loron tolu hahu husi data ohin dia 6 de outobro to’o 8 de Outobro de 2025, bainhira Universidade la foti medida imediata ba eziiénsia ne’ebé temi iha leten mak ami estudante departamentu políticas públicas sei blokei departamentu too hetan desizasaun,” Agustinho hateten.
Tuir Agustinho katak iha konferensia imprensa, estudante sira ne’ebe hetan asédiu sexuál husi dosente refere hatun sira-nia dignidade, no la sente seguru iha prosesu aprendizajen no balun lakon nia estudu tanba de’it hahalok predator sexual.
Fatin hanesan peskizador inosensio Xavier hateten aktu predator sexual ne’ebé lansa hosi dosente MB ne’e Crime no husu ba nivel departamentu no fakuldade atu akompainha prosesu ne’e to hetan solusaun, tanba aktu ne’e la hatudu edukador ne’ebé diak..
”Hanesan alumi husi universidade siénsia polítika senti tiste bainhira dosenti ida halo asedu sexual hasoru estudante liu-liu ba estudante feto sira no ha’u nia maluk balu ne’ebé dadaun sai vítima ba kazu ne’e tan ne’e nia prosesu ne’e kriminal tebes, ita husu ba nivel departamentu no Fakuldade atu akompaiña prosesu ne’e, ita kontra individu hatudu hahalok la hanesan edukador ne’ebé diak,” nia argumenta.
UNTL núdar instituisaun estadu nian neʼebé sai hanesan espasu ba estuda, peskiza no dedikasaun komunitaria, hodi dezenvolve siensia, teknolojia no kultura iha Timor-Leste, nune’e UNTL tenke promove ambiente ida ne’ebe seguru, inkluzivu no ekuitatīvu, la iha toleránsia ba deskriminasaun no violensia ho forma oioin kontra direitu ema nian, liu-liu violénsia bazeia ba jéneru, violasaun sexuál, asédiu sexuál hasoru estudante feto sira.
Entretantu, too notisia ne’e publika parte redasaun lafaek news seidauk halo konfirmasaun ho parte MB ne’ebe deskonfia pratika asedu sexual inklui seidauk halo konfirmasaun ho estrutura nivel altu Universidade Nasional Timor Loro Sa’e nian.
Jornalista estajiadu : Ana Maria
