Lafaek News—Institutu Nasionál Kombatentes HIV-SIDA (INCSIDA), sei esforsu atu harii uma prostituisaun atu nune’e minimiza moras sexuál livre Timor-Leste iha futuru.
Prezidente INCSIDA Daniel Marçal hatoo asuntu ne’e ba jornalista sira iha nia kna’ar fatin INCSIDA-Pantai Kelapa Dili katak, ohin loron atividade prostituisaun livre tebes iha sidade Dili, ikus mai impaktu virus HIV-SIDA, tan ne’e, INCISDA planu harii uma dignu ba maluk sira ne’ebé hala’o atividade moris nian liu hosi prostituisaun atu fasil kontrola hosi autoridade.
“Ami halo esforsu makas ko’alia ho autoridade liu-liu parte autoridade Rejiaun sira tanba ita iha timor iha relijiaun lima, hanesan Katólika, Prostentantes, Hindu, Buda no Islam, ita kordena hela sira nia hanoin halo nusa tan a iha konseptu ida hanesan ne’e, sé ita hotu husik de’it sexu livre hanesan ita dehan sexu livre ne’e di’ak, se ita halo fatin ba sira ne’e ema públiku nia hanoin ne’e dehan katak sexu livre ne’e di’ak, estadu ba prepara fali fatin ba sira, maibé la’os hanoin hanesan ne’e justu ita husik livre hanesan ne’e perigozu liu,” Prezidente INCSIDA Daniel Marçal ba Jornalista sira iha resintu, INCSIDA Pantai kelapa, Segunda-feira.06/10/2025.
Nia dehan, bainhira iha fatin lokalizasaun dignu ba maluk prostituisaun sira, fasil liu atu kontrola, no fasil liu ema bele hetan konsiensializasaun lalais hodi fila ba feto normal hodi kaben fila-fali.
“Nia sei bele sadar muda nia hahalok no sai feto di’ak kaben fila-fali buka osan ho parte seluk ne’e di’ak entaun ema hatene no, katak nia tau iha fatin hanesan, maibé ema nia bá halo subar de’it ne’ebé la’os bomba mak tarutu para ita ba buka tuir nee la iha,” nia dehan.
Daniel salienta, INCSIDA pronto estabelese fatin ba protituisaun, maibé depende konkordánsia no koñesimentu hosi parte kultura, Igreja no estadu, atu nune’e iha legalidade no fasil hetan kontrolu ne’ebé diak.
“Ida ne’e lá’os INCSIDA nia planu, ne’e ita hotu-hotu haree tanba sá, tanba primeiru ita tenke hatene katak atividade sexuál livre ne’e ita Timor ne’e iha ka la’e, iha Munisípiu Dili iha ka la’e iha Munisípiu sira seluk iha ka lae, se buat ne’e iha perigozu transmisaun HIV ne’e,” nia informa.
Jornalista : Moises Guterres
