Lafaek News (Matata)-14 Marsu 2022,Enkarregadu Negósiu Embaixada EUA, Tom Daley no Diretora Misaun USAID Zema Semunegus, ohin vizita líder komunidade sira iha Ermera ne’ebé servisu atu hapara violénsia bazeia ba jéneru ho apoiu husi Estadus Unidus.
Liu-hosi projetu Harmonia ho orsamentu millaun $1.2, komunidade sira iha suku 31 iha Ermera no Likisá kompleta ona inisiativa lubuk ida neebé dezeña atu kria mudansa sosiál hodi hapara violénsia bazeia ba jéneru hasoru feto no labarik Timor-oan sira no hadia servisu saúde ba vítima violénsia bazeia ba jéneru. Membru komunidade liu 3.000 no professional saúde 280 partisipa iha projetu ne ‘e.
“Obrigadu ba ita boot sira nia partisipasaun iha programa ida ne’ e, nu ‘udar ezemplu ida husi oinsá Estadus Unidus no Timor-Leste nia parseria ne’ebé kria oportunidade ba povu Timor-Leste,” hatete Enkaregadu Negósiu Tom Daley iha nia diskursu ba lider komunitáriu sira. “Bainhira feto no labarik feto sira bele moris livre husi ta’ uk ba abuzu no violénsia sira, sira bele hatudu sira-nia talentu tomak. Ida ne’ e importante tebes atu asegura katak ita hotu bele hatán ba dezafiu sira iha futuru, inklui dezenvolvimentu ekonómiku.”
Liuhosi projetu Harmonia, ONG lokál Hamnasa halo parseria ho parseiru prinsipál sira hodi fornese formasaun sira iha baze atu harii konsensu no foti asaun hodi rezolve dezafiu sira kona-ba violénsia bazeia ba jéneru no mós formasaun ba professional saúde sira kona-ba oinsá atu responde ba violénsia bazeia ba jéneru. Projetu ne ‘e implementa iha munisípiu Ermera no Liquiça, iha ne’ebé taxa violénsia bazeia ba jéneru boot liu iha nivel nasionál.
Vizita husi Enkaregadu Négosiu no Diretora Misaun USAID ne’e nu’udar parte ida husi Misaun EUA nia komemorasaun atual ba tinan 20 relasaun diplomátika entre EUA no Timor-Leste ho tema “Belun, Parseiru, Oportunidade.” Dezde Estadus Unidus no Timor-Leste hahu nia relasaun diplomátika iha 2002, Estadus Unidus kontribui ona liu millaun $250 hodi apoia dezenvolvimentu inkluzivu no pasífika, atu lori ba Timor-Leste ba prósperidade, saudável no auto-rezilénsia. Liu husi USAID, Misaun EUA iha Timor-Leste sei kontribui liu tokon $92 durante tinan lima oin mai hodi hametin ekonomia no governasaun Timor-Leste nian.
Media Embaixada Amérika TL
Editor : Agapito de Deus
