Lafaek News–Tuir kalendáriu Comisaun Nasional Eleisoens (CNE), kandidatu prezidente repúblika númeru sorteiru 14, Premiadu Nobel ba Paz, José Ramos Horta, iha loron tersa (15/03/2022), sei hala’o kampaña polítika ba loron ikus iha kampu Tasi-Tolu.
Sekretáriu jeral partidu CNRT, Francisco Kalbuady Lay, husu militantes CNRT ho apoiantes, movimentus oi-oin, partidus polítikus hotu ne’ebé apoiu kandidatu prezidente númeru sorteiru 14 nian atu la’o ho disiplina, evita an husi krime, tanba kampaña sei hahú loron tomak husi dadeer tuku 08:00 too tuku 5 : 00 loro-kraik.
Liu husi konferensia Imprensa, Sekretariu Jerál Partidu CNRT, Francisco Kalbuady Lay, apela ba estrutura Nasional Partidu CNRT hahú husi CELCOM, NUREP, Koordenador postu iha munisípiu Dili no mos ba militantes, simpatizante no apoiantes husi movimentu polítiku sira hotu ne’ebé apoiu kandidatura Jose Ramos Horta nian katak, Kampaña sei hahu iha loron Tersa oras tuku 08.30 dadeer too iha 17.30 lokraik iha Tasi Tolu,
Ha’u atu informa de’it katak, mobilizasaun militantes, simpatizante no apoiantes sira sei konsentra hamutuk iha kada postu administrativu ida nian, antes atu hala’o konvoi ba Tasi tolu,’’ katak SekJen partidu CNRT ba jornalista sira liu husi konferénsia imprensa iha sede CNRT segunda ne’e.
Nudar Sekretariu Jerál Partidu CNRT, apela dala ida tan ba simpatizante hotu, kuadrus, Militantes no apoiantes hotu atu la’o ho disiplina no respeitu lei no ordem publika hodi evita provokasaun no hases aan husi aktu violénsia durante komisíu iha Tasi Tolu,”dehan Francisco Kalbuady Lay.
Kalbuady Lay husu mos ba militantes no apoiantes sira hotu atu respeitu sinaís tránzitu no respeita mos ba ema seluk nia liberdade hodi uza estrada públiku hodi nune bele kiria ambiente Paz no domin iha festa demokrasia iha eleisaun Prezidensial 2022 – 2027.
Jornalista : Abekha Raihusar
Editor : Agapito de Deus
