Lafaek News--Kandidatu Prezidente Repúblika númeru sorteiu 14, premiadu Nobel ba Paz, José Ramos Horta, hateten enkuantu povu fo lejitimidade iha loron 19 fulan Marsu, sei halo auditoriu ba fundus covid no auditoriu ba Ro Haksolok.
Horta hatoo asuntu ne’e iha nia komisíu polítika kampana ba dala-14 iha kampu futebol munisípiu Likisá, segunda (14/03/2022), hodi dehan governu ida ne’e gasta osan besik bilioens, maibé dezenvolvimentu iha ne’ebé?
‘’Ha’u hateten ba ba Likisá, kuandu ha’u simu todan iha loron 19 Marsu, ha’u sei halo auditóriu ba fundus covid no auditóriu mos ba Ro Haksolok, governu ida ne’e gasta osan boot bilioens 7, más dezenvolvimentu iha ne’ebé,’’ katak kandidatu José Ramos Horta iha munisípiu Likisá segunda ne’e.
Iha oportunidade polítika ne’e, Ramos Horta, dehan bainhira simu todan karik husi povu, hanesan xefe estadu oinsá ko’alia ho governu ida iha oin mai atu promove setor privadu, hanesan agrikultura, indústria iha rai laran konsidera arte kultura hanesan identidade Timor nian ba iha mundu, sei dada mós investores husi rai-liur mai investe iha rai-laran atu dudu ekonomia rai laran la’o ho sustentabilidade másimu.
Horta promete, sei loke auditoria ba programa Cesta ba sesta bázika, no Ro Haksolok, Expo Dubai no instituisaun estadu balun inklui fundu ba Covid, iha sorin seluk kandidatu númeru sorteiu 14 n’e’e ko’alia mós Kona-ba kazu krize 2006, eis-prezidente repúblika 2007-2012 ne’e, promete sei loke prosesu investigasaun tanba tuir kandidatu nasional ne’e hetan akuzasaun husi partidu balun iha periodu kampaña eleisaun prezidensial ne’e.
‘’Krize 2006, ha’u sei loke prossesu tomak liu husi prokuradór jerál, ho eveidénsia atu loke, inklui komissaun internasionál ida atu hare ba ida ne’e ‘’, hatutan Horta.
hodi dehan, atu rezolve konstituisaun ne’ebé tuir partidu CNRT violadu ona, Horta bainhira eleitu sei buka atu rezolve hodi hatur fali lei inan ne’ebé prezidente Francisco Guterres Lú Olo viola iha nia fatin.
Kampaña ne’e hetan partisipasaun máxima husi komunidade, militante no simpatizante CNRT, partidu apoiantes seluk, movimentu sira, kuaze ema rihun resin, nune’e mós, hetan observasaun husi CNE sosiedade sivíl inklui observadór internasionál husi Uniaun Europeia.
Jornalista : Abkeha Raihusar
Editor : Agapito de Deus
