Lafaek News— Espoza Prezidente Repúblika, Cidália Nobre Guterres, agradese Associasaun Komérsial Komunidade Chinesa Timorense ohin, entrega ba doasaun aihan ba gabiente de Apoiu á atividade GAAC-PR) hodi apoiu Timor-oan sira ne’ebé presiza hela tulun.
“Onra tebes mai ha’u nomós ba gabinete (GAAC-PR) hafoin simu tan informasaun katak sei ihatan doasaun husi ita-nia maluk sira iha Syney Australia, Prezidente ho estrutura sira iha ne’ebá, hakarak fó apoiu ba dala rua mai iha gabinete ha’u nian, atu ita hamutuk hala’o asaun solidaridade ba ita-nia komunidade sira ne’ebé maka afetadu, liuliu hirak ne’ebé presiza tebes iha situasaun ida agora”, afirma Cidália Nobre Guterres, ne’ebé agradese mós ba timoroan sira seluk ne’ebé hala’o ona asaun solidaridade hanesan.
Espoza Prezidente Repúblika ne’e relata, apoiu dahuluk ne’ebé GAAC-PR simu husi asosiasaun ne’e, distribui ona hodi tulun komunidade afetadu husi inundasaun iha Hera, Masilidun, Lahane, ba estudante sira, ba Parokia Balide no komunidade sira ne’ebé prezisa tebes apoiu.
Cidália Nobre Guterres subliña apoiu hirak ne’ebé GAAC-PR distribui, la’o tuir verifikasaun ida ne’ebé hala’o ho rigor, nune’e apoiu sira ne’e bele to’o duni ba hirak ne’ebé presiza.
Doasaun ida ne’e, hanesan doasaun faze daruak ne’ebé komunidade xineza Timor-oan, ne’ebé halibur iha AsosiasaunXineza Timoroan Syney, fó liu husi Gabinete de Apoio à Actividade do Cônjuge do Presidente da República (GAAC-PR), hodi hala’o asaun solidaridade, apoiu timoroan sira ne’ebé foin lalais sofre inundasaun iha fulan hirak liu ba no ba hirak ne’ebé oras ne’e hasoru difikuldade tanba situasaun pandemia Covid-19.
Prezidente ACCCTO, Kathleen Gonçalves, informa, apoiu ida ne’e atu tulun GAAC-PR kontinua hala’o nia asaun solidaridade no hato’o mós kumprimentus no saudasoens husi Prezidente Asosiasaun Xineza Timoroan Syney, Tony Vong ho nia estrutura, ba Espoza Prezidente Repúblika.
“Ita hasoru situasaun rua ne’ebé difísil tebes, ida maka pandemia no kalamidade, Ita hotu hatene, iha apoiu barak husi maluk sira, ita labele sura ida-pur-ida, maka halo ona ba ita nia komunidade sira hotu. Tulun sira ho apoiu aihan, nesesidade, konta mós ho apoiu Asosiasaun Xineza Timoroan,” Kathleen subliña
Kona-ba apoiu darauk, GAAC-PR, aleinde sei kontinua fó ba komunidade afetadu inundasaun no estundante sira iha Díli, sei distribui mós ba komunidade afetadu inundasaun no sira ne’ebé presiza tulun, iha munisípiu.
Ba estrutura ACCCTO no Asosiasaun Xineza Timoroan Syney, Cidalia Nobre hato’o Prezidente Repúblika, Francisco Guterres Lú Olo, nia apresiasaun: “Prezidente mós hato’o nia kumprimentus, hakuak boot, fó saudasaun ba Prezidente (ACCCTO) Kathleen no estrutura tomak, mós hato’o saudasaun ba Prezidente Tonny Vong iha rai liur, ne’ebé hanoin nafatin hodi fo apoiu mai gabinete hodi halao asaun ida ne’e”.
Mídia PR
Editor : Agapito de Deus
