Lautem-(Lafaek News)—Administradór Munisípiu Lautém (AML) Domingos Savio, informa ekipa taskforce munisípiu Lautém planeia fasilita entidades ne’ebé iha Dili fila ba Lautém.
“Ita foin ko’alia, ita sei koko oinsá atu fasilita ita nia ema sira ne’e mai ita persiza kolóka ita nia pesoal saúde Munisípiu ninian iha Dili sidadaun sira bele teste sawb iha ne’ebá, iha rezultadu ne’e ema nain hira mak teste iha ne’ebá ona pois ita aranja kareta bus ruma ba tula sira maibé osan ba transporte nian sira selu rasik autoridade fo de’it lisensa ba bus hodi ba tula sira husi Dili mai Lautém,” katak Administradór munisípiu Lautém, Domingos Savio, ba jornalista sira iha Lautém segunda semana ne’e.
Administradór ne’e fundamenta, katak ekipa task force lautém hanoin ona ida ne’e sei halo kordenasaun ho governu sentral atu haree oinsá fasilita entidades sira bele fila ba munisípiu, maibé la autoriza Lautém-oan atu ba Dili sei kontinua nafatin estadu emerjénsia no serka sanitária ne’ebé funsiona hela iha Dili.
“Teste ne’ebé halo iha Dili atu mai munisípiu ne’e lable liu loron tolu nia sei la mai Munisípiu teste foun fali tanba ne’e sei kolóka médiku iha Dili hodi haree ba assuntu ne’e no buka mós fatin atu nune’e médiku sira uza hodi halo teste ba sidadaun Lautém-oan sira no lalais ba laboratórium, bainhira teste hotu ona bele sai kedas ba munisípiu Lautém.
Entretantu, autoriade munisipiu Lautém liu husi Ekipa taskforce munisipiu oras servisu makas hodi kombate propagasaun covid-19, liu husi kuarantena ba abitante ne’ebé liu dalan illegal husi Dili ba Lautém, tanba da-daun ne’e iha ema pozitivu na’in-3 iha munisípiu refere.
Jornalista : CE. Lautém
Editor : Agapito de Deus