Lafaek News–Mikrolete numeru 01 to’o 12 iha Dili Laran, ohin 26/04/2022, halo asaun Mogok tanba kombustivel folin sae, maibé resposta husi Diresaun Nasional Transporte Terestre (DNTT), husu atu kontinua halo movimentu ho tarefa normal tanba tempu besik sei hetan subsídiu husi governu.
Diretor DNTT Antonio da Costa informa, bainhira motorista Mikrolete atu halo asaun mogok tenke konsulta lai ho DNTT, tanba governu ema hotu nian la’os, ema ida nian, maibé realidade sira bolu malu ka fo hatene malu iha dala-dalan hodi halo asaun mogok.
Ami la toba ba imi nia preokupasaun tempu besik imi (motorista), teritóriu tomak sei hetan subsídiu fulan 3, kada loron ita boot sira hetan mina litru 15 husi governu relasiona ho kombustivel tanba foin lalais konsellu ministru aprova ona subsídiu ba ita boot sira,” dehan Diretor DNTT Antonio ba Lafaek News iha nia kna’ar fatin Balide Dili, Tersa 26/04/2022.
Diretor DNTT ne’e afirma, bainhira motoristas sira atu hala’o asaun mogok, mai uluk DNTT, tanba nasaun ne’e ema hotu nian, ema mak tanke halo di’ak ba nasaun la’os nasaun mak atu halo diak ba ema, tanba ne’e tenke kontribui ba nasaun liu husi ida-idak nia atividade.
Husu ita boot sira atu halo movimentu kontinua ho tarefa normal no ita boot sira presiza atu kopera ho ami la bele foti desizaun mesak tanba imi bele hetan uituan oinsa ho ita nia alileba sira balun la hetan buat ida fila ho bolsu mamuk, imi la hanoin ka?” Diretor DNTT ne’e rekomenda.
Motorista mikrolete iha Dili laran tenke hanoin pasajeirus sira tanba moris ema ida-diak nia la hanesan maibe DNTT Sei rezolve liu husi subsidiu hodi resposta ba motorista transporte públiku sira nia preokupasaun.
Iha sorin seluk, Porta voz Mikrolete diresaun 01 too 12, Domingos Gusmão da Cruz relata, sira nia prekupasaun maka agora folin kombustivel sa’e maka’as entaun sira sente la hetan rendimentu ne’ebé sufisiente atu resposta ba nesesidade loro-loron.
Agora ne’e rendimentu mai ami menus impaktu husi mina folin sae, entaun ami nia hakarak DNTT fo autoriza mai ami atu hasae tarifa ba estudante sira, selu centavatus 0.20, funsionariu no publiku sira selu hanesan baibain nunee bele sufisiente netik mai ami,” Domingos Deklara.
Domingos Argumenta, Husu ba estudante hotu-hotu tarifariu agora normal fali maibe depende ba estudante sira nia konsiensia deit se hanoin motorista sira entaun sira selu bele liu estandar.
Hafoin ami hatama karta autorizasaun ba DNTT hatan kedas ba ami nia karta nee katak, bele kontinua halo movimentu maibe tarifariu ba estudante sira la iha mudansa tanba tempu badak ami sei hetan subsidiu husi governu nian relasioan ho komvustiel,” nia realsa.
Tuir dadus ne’ebé Lafaek news asesu husi DNTT, transporte públiku ne’ebé DNTT rejistu ona atu hetan subsídiu hamutuk rihun tolu resin, maibé agora subsídiu refere sei iha hela prosesu nia laran.
Observasaun Jornalista Lafaek News nian iha terenu katak, Mikrolete iha Dili laran husi numeru 01 too 12 maioria mak paradu, maibe iha mikrolete balu kontinua halo movimentu tula komunidade no estudante sira hanesan baibain.
Jornalista : Orlando Magno
Editór : Agapito de Deus
