Lafaek News—Sekretariu Estadu Protesaun Sivil (SEPS) liu husi Diresaun Nasionál de Prevensaun de konflitus komunitária (DNPKK), kolabora hamutuk ho parte Universidade Nasional Timor Lorosa’e (UNTL), g7+ no NGO Belun, fahe informasaun ba estudante fakuldade siénsia sosial, kona-ba prevensaun  konflitu hodi kontribui pas, estabilidade no dezenvolvimentu nasionál.

Tuir dekanu Fakuldade Siénsia Sosiál (FSS-UNTL), Camilo Ximenes, hateten, atividade formasaun ida ne’e importante teb-tebes ba estudante sira, tanba ne’e tenke partisipa máximu no bele muda  sira  nia komportamentu.

“Ita bele matenek too iha ne’ebé de’it,  más kuandu ita nia komportamentu ne’e ladun di’ak quer dizer ita nia matenek ne’e laiha valor,” dehan dekanu  FSS UNTL Camilio Ximenes iha kampus FSS UNTL kaikoli, Tersa (19/10/2021).

Dekanu argumenta, matenek ne’e atu iha nia valor, kada ema ida-idak tenke respeita aan rasik no respeita mós ema seluk, ne’e katak ema ne’ebé hadomi nia aan no sai valor ne’ebé boot.

Iha sorin seluk diretor Nasional Prevensaun Konflitu Komunitaria, Antonio Viegas, hateten prevensaun konflitus ne’e importante tebes ba estudante UNTL sira.

“Se ita boot sira (estudante) hakarak dezenvolvimentu ne’e mai makas liután entaun prevene konflitus no bem vindu dezenvolvimentu,” hateten António Viegas

Entretantu, partispa iha programa edukasaun sívika ne’e kompostu husi Diresaun Nasionál Prevensaun Konflitu Komunitária (DNPKK),  g7+ no NGO Belun, inklui estudante hamutuk 60 resin kompostu husi departamentu administrasaun publika, komunikasaun sosial, dezemvolvimentu komunitáriu, relasaun internasional, polítika públika no siénsias politika.

Estajiaria  : Carla Borges.

Editór        : Pedro de Almeida