(Lafaek News ), Dili – 16 -1-2022 – Estrutura Dewan Solidaritas Mahasiswa Pemuda Pelajar Timor-Timur (DSMPPTT) iha Sabadu (15/1) aprezenta planu estratéjiku organizasaun nian atu alkansa vizaun no misaun foun iha era independénsia ida-ne’e hodi liberta povu Timor-Leste husi kiak no mukit liuhusi ninia konsetu ekonómia populár no programa sira ne’ebé hatuur ona iha planu estratéjiku refere.
Prezidente Atuál Dewan Solidaritas, José Magno, iha ninia diskursu obertura ba aprezentasaun planu estratéjiku iha Salaun Institutu Nasionál Saúde (INL) – Comoro, hateten enkontru ida-ne’e ho objetivu atu aprezenta organizasaun nia planu estratéjiku ba tinan lima no aprezenta mós rezultadu peskiza kona-ba istória partisipasaun organisaun nian iha prosesu libertasaun nasionál.
“Ita bele dehan planu estratéjiku ne’e depois bele sai referénsia ba membru Dewan hotu-hotu. Ita tenta hahú promove ona konsetu báze ekonómia povu. Ida-nee sei aprezenta iha enkontru nee. Nú mínimu hanesan vizaun ruma para depois hanoin membru sira Dewan nian atu sai revolusionáriu foun ba luta libertasaun povu,” Sr. José Magno haktuir.
Tuir nia, konsetu ekonómia populár ne’ebé hatuur ona iha planu estratéjiku atu ajuda hadi’a povu Timor-Leste nia moris iha kontestu devenvolvimentu nasionál bazeia ba planu estratéjiku nasionál ne’ebé país ne’e iha.
“Ita bele dehan katak povu labale halerik ba bee-moos, hanesan tuir ita nia planu estratéjiku nasionál. Ita hakarak ita nia povu ne’e loron ida bele han dala tolu ka dala haat no iha rendimentu ne’ebé adekuadu ka rendimentu médiu ne’ebé mak sai hanesan tarjetu Estadu nian. Entau, nu’udar organizasaun rezisténsia, ita tenta atu la’o fali ho ekonómia populár ida. Oinsa ita fortifika membru sira atu hala’o ekonómia kreativu iha báze hodi kontribui ba dezenvolvimentu nasionál liuhusi parseria ho Estadu,” nia akresenta.
Relasion ho papél kontrolu sosiál DSMPPTT nian iha kontestu dezenvolvimentu no governasaun, Prezidente Atuál Dewan ne’e haktuir, nu’udar organizasaun rezisténsia, Dewan Solidaritas sei kontinua hala’o nia funsaun kontrolu sosiál liuhusi parseria Krítika ho Estadu.
“Kontrolu sosiál ne’e katak kontrolu ida ho perseria Krítika ida ho Estadu katak ita tenta oinsa atu suporta saida mak Governu hala’o iha planu estratéjiku ba objetivu nasionál no ita sei kanta ba públiku tamba dadauk ne’e ita reajusta fali Dewan iha báze ka iha munisípiu sira. Entau, Dewan sai lian ba sira ne’ebé lian laek ka voice of the voiceless hanesan Amo Belo hateten. Asaun ida-nee tenke mai husi báze mak mai iha nasionál,” nia hatutan.
Tuir planu, DSMPPTT ne’ebé koñesidu ho Dewan Solidaritas sei organiza kongresu nasionál iha Fevereiru 2022 atu hili ninia estrutura foun hodi lidera organizaun estudantil rezisténsia ne’e hodi materializa vizaun no misaun ne’ebé hatuur ona iha planu estratéjiku tinan lima nian.
Depois referenduu, tuir kompromisu polítiku, ativista Dewan Solidaritas fila ba universidade hodi kontinua sira-nia estudu no envolve-an iha setór edukasaun, hahú hosi ensinu primáriu, sekundáriu to’o ensinu superiór, depois liu 80% edukadór Indonézia fila ba sira-nia rai iha 1999. To’o ohin-loron, kuaze 90% hosi edukadór sira iha Timor-Leste mai hosi Dewan Solidaritas. Membru Dewan Solidaritas balu mós dadauk ne’e serbisu iha ONG sira, serbisu iha area jornalizmu, administrasaun públiku no balu fali sai polítiku.
Kontribuitór : Lafaek News
Editór : Lafaek News
