Lafaek News-Populasaun nain 2 mate no nain 20 baixa hela iha Hospital Nasional Guido Valadares (HNGV) hafoin sofre moras dengue iha suku Kaikoli, postu administrativu Vera-Kruz, munisípiu Dili.
Xefe suku Kaikoli, Hipolito M Sarmento, sente preukupadu tanba nia populasaun kuaze ema 20 resin mak baixa ona iha HNGV tanba sofre moras dengue.
Iha ne’e ha’u ho ha’u nia membrus sira halo sosializasaun ba komunidade sira, ami halo sosializasaun no avizu ba komunidade sira, husi ministériu saúde MS mos halo sosializasaun husi media sira, maibe konsekuénsia moras mak nune ona, ita hotu tenke kolabora entre Ministeria Saude (MS) Autoridade sira no Komunidade sira atu nune, halo limpeza iha uma, bairu laran sira, atu prevene-an husi moras ne’e,’’ katak Hipolito ba lafaek news iha kna’ar fatin sede suku Kaikoli, segunda (24/01/2022).
Autoridade suku Kaikoli ne’e dehan, infelizmente durante ne’e seidauk iha grupo Rega Susuk mai rega iha suku kaikoli, más iha suku seluk rega susuk la’o rutina loos.
Ha’u hare rega ona, más ami hein, dala ruma tuir oráriu husi Ministeria Saúde no sentru saúde mak nune, ami hein, Ha’u husu ba ministra saúde, haree rasik no rona rasik ona, iha suku ba suku no fatin ba fatin, moras dengue kada loron volume aumenta, hau sujere liu tenke reja aimoruk susuk nian ne’be iha ba fatin hotu, rega mos iha dili laran liu-liu kaikoli tamba ita hatene kaikoli,’’ xefe suku Kaikoli argumenta.
Estajiadu : Leandrino Soares
Editor : Agapito de Deus
