Lafaek News—Líder polítika sira no membru governu inklui reprezentante povu iha uma fukun Parlamentu Nasionál, sira la sente no la halerik konsikuénsia husi serka sanitáriu, tanba iha osan barak atu responde ba sira nia moris loro-loron, maibé povu kiik hasoru duni no sente ona hamlaha ne’ebé afeta husi polítika governu nian aplika serka sanitaria iha Munisípiu Dili.
Bainhira loos mak serka sanitáriu ne’e too iha rohan, tanba iha lidun sidade Dili, povu kiik sira halerik ho lian hanesan de’it, laiha osan no hahán, oinsá atu bele aguenta too serka sanitáriu ne’e remata, senáriu sira ne’ebé sei akontese bainhira hanaruk bei-beik serka sanitáriu, posibilidade covid-19 sei la oho povu kiik sira, maibé bele lakon isin lolon tanba de’it hahán bikan ida.
Povu kiik sira laran metin liu ba deputadu sira ne’ebé tuur iha kadeira Parlamentu Nasionál, atu bele ko’alia hasoru governu kona-ba povu kiik sira nia moris iha situasaun atual, maibé dala ruma mós reprezentante povu nian haluha koa’lia, tanba sira la sente saida mak krize hahan iha uma laran hanesan povu kiik sira sente da-daun.
Maski povu kiik sira deklara mo-mos ona katak sira nia hahán hotu ona, osan mós laiha ona, maibé serka sanitáriu aumenta bei-beik nia loron naruk tan ba loron 30, atu hetan osan labele tuur de’it iha uma, realidade defisiénsia fíziku Abilio Araujo ho nia kaben no oan na’in 2 hasoru difikuldade aihan uma laran iha situasaun serka sanitáriu.
“Ha’u nia atividade ne’ebé bele fó moris ba ha’u maka liu husi desportu Tenis Meza, no toka muzika ba festa sira hodi hetan osan,, maibé serka sanitáriu ne’e mosu impede hotu ha’u nia atividade, entaun ha’u laiha ona osan atu sosa foos, dehan defisiénsia Abilio Araujo ba lafaek news iha nia kost fatin aldeia Metin-4 bebonuk, tersa (30/03/21).
Situasaun real ne’ebé defisiénsia Abilio ho nian kaben inklui oan feto rua ne’ebé sei kiik hasoru da-daun foos iha uma laran menus, foos hela de’it kilu-4 iha saku laran posibilidade sei labele aguenta haan too semana id.
Abilio espresa, relasionadu ho polítika oitavu governu konstitusional aplika estadu emerjénsia iha territóriu no aumenta tan serka sanitáriu (lockdown) iha munisípiu Dili, afeta tebes ba povu kiik sira hanesan, kbiit laek, defisiénsia no ema sira ne’ebé laiha fatin servisu, risku tebes ba sira nia moris lor-loron liu-liu nesesidade uma laran.
“Serka sanitáriu maka laiha karik família sira husi foho bele lori netik batarm aifarina mai, maibé dalan taka, ami laiha ona hahán no osan mós laiha,” katak defisiénsia ne’e ho lian triste.
Defisiénsia fíziku Abilio de Araujo, moris iha loron 4 Abril, 1990, husi munisípiu Ermera, postu administrativu Hatulia suku Manusae, iha Dili hela iha kost iha aldeia Metin-4 suku Bebonuk, postu administrativu Don Aleixo, munisípiu Dili.
Abílio ho nia kaben Leonita da Silva ho sira nain rua nia oan feto nain rua, iha ne’ebe oan feto dahuluk idade tinan 3, no feto daruak idade kiik foin atu haka ba tinan ida.
Jornalista : Acacio Pinto
Editora : Nelya Barros
