Lautém-Lafaek News—Liu husi enkontru konjunta ne’ebé halo husi ekipa taskforce ho autoridade munisípiu Lautém, iha segunda semana ne’e, sujere atu hapara tan atividade hotu durante semana ida iha Munisípiu hodi fo biban ba ekipa saúde hasai swab ba sidadaun sira ne’ebé iha kontaktu direta pasiente pozitivu Covid19 ida iha suku Home.
“Iha Lautém sei nafatin pozitivu ida de’it tanba ne’e ohin ha’u kontakta direta ona ba Ministru edukasaun para sei fo orientasaun, informasaun ruma extende ou fo ona biban ba prossesu aprendijazem entaun loraik sei iha desizaun husi ministru edukasaun,” katak administradór Domingos Savio ba jornalista sira iha Lautém segunda semana ne’e.
Administradór ne’e dehan, presiza estende tan atividade hotu iha munisípiu Lautém, atu fó biban ba ekipa saúde sira halo swab ba abitante sira ne’ebé deskonfia kontaktu ho pasiente covid-19 ida husi suku Home.
“Ha’u hanoin persija estende tan semana ida ita fo biban ba ita nia saúde sira ne’e hodi foti swab ba sidadaun sira ne’ebé kontaktu besik sidadaun suku Home oan ne’ebé pozitivu se ema sira ne’e nia swab manda ba Dili negativu hotu semana oin atividade hotu-hotu iha Lautém bele la’o fila fali,” katak nia.
Entertantu ekipa taskforce covid19 munisipiu Lautém halo sorumutu ne’e hodi haree ba servisu ekipa nian durante semana ida, ekipa monta ona postu vijilánjia-2 iha Munisípiu Lautém hanesan pontu entradas Laivai no pontu entradas Irabere Iliomar ho munisipiu vikeke hodi kontrola komunidade ne’ebé sai no tama mai iha Munisípiu Lautém, tanba ne’e atividade hotu sei suspende hahu husi tersa (30/03/2021) no sei remata iha loron 5/04/2021.
Jornalista : CE. Lautém
Editora : Nelya Barros
