Lafaek News -Centru Nasionál Chega IP (CNC) servisu hamutuk ho GIZ- SAUP, realiza workshop dezeminasaun arkivu istóriku CAVR iha Centru Nasional Chega ba peskizadór, kompostu husi, dosente, estudantes universitáriu no sosiedade sivil hodi sai hanesan fontes prinsipál ida iha prosesu elaborasaun traballu akadémiku no uza prosesu ensinu aprendizajen iha ensinu superior.
Diretór Centru Nasional Chega IP (CNC), Hugo Maria Fernandes hateten, arkivu istóriku ne’e ho konteudu ida husi instituisaun tolu mak hanesan, Comissão Akolhamentu, Verdade no Rekonsiliasaun (CAVR), Comissão Verdade no Amizade (CVA) no Centro Nacional Chega (CNC) rasik.
“Arkivu sira ne’e, ita simu husi entidade organizasaun rai laran, rai liur no ema sira, entaun bazeia ba lala’ok sira ne’ebé mak hanesan ohin ha’u dehan, primeiru hahú uluk ho elabora politiku arkivu nian, politiku arkivu ne’e komponente importante oinsá mak halo tratamentu ba arkivu sira ne’e, tanba arkivu balun tuan los ona, balu foun, iha kategoria balun vidio, balun audio, balu surat tahan,” dehan Diretór CNC, Hugo Fernandes, ba Jornalista sira iha salaun konferénsia CNC Balide Dili, sesta-feira, (21/01/2022).
Nia informa, prosesu rezerva atu tau matan didi’ak hanesan arkivu sira audio ne’e oinsa mak dijitaliza, oinsá mak surat tahan sira bele dijitaliza ba tempu naruk entaun komponente tolu ne’e, aumenta tan oinsa mak atu salva husi dezastre sira, karik iha dezastre naturais, karik iha buat sira ne’ebé mak nunka espera.
”Ita tenke halo klasifikasaun bele ka lae, ema asesu ka labele, tanba arkivu balun ho kondisaun ne’ebé mak sensitivu, ne’ebé mak tenke rai nia potensialidade, no ita mós halo kategoria kona-ba arkivu ne’ebé ema bele asesu, i ema sidauk bele asesu,” informa Nia.
Enkuantu liuhusi deseminasaun ida ne’e hakarak fó ba Dosente sira, akademiku sira, estudante sira, no organizasaun sosiedade sivil, nomós aban bairua keta iha Jornalista balun interese hakerek kona-ba pasadu sira nia bele mai asesu arkivu sira ne’e.
Atividade workshop ne’e hetan partisipasaun husi dosentes inklui mós estudantes balun husi Universidade haat hanesan, UNTL, UNPAZ, UNDIL no UNITAL.
Jornalista : Joni Mau Risa
Asisten Editora : Juvita dos Santos
