Lafaek News (Ainaru)-Manajer Kooperativa Kafe Timor (CCT) Moises Jose do Rego husu apoiu materia ba Prezidente Repúblika Francisco Guterres Lu Olo, bele aumenta kualidade Kooperativa kafe iha munisipiu Ainaru postu Administrativu Maubisse.
Manajer Kooperativa Kafe Timor hatoo asuntu ne’e hafoin hetan vizita husi Prezidensia Repúblika Xefe Kaza Sivil Francisco Maria de Vasconsellos iha munispiu Ainaro fatin CCT segunda ne’e (16/08/2021).
“Sente kontente tebes ho xefe estadu nia prezensa iha fatin ida ne’e, ho oportunidade ida ne’e ami mos bele hatoo ami nia preokupasaun, hodi bele fo apaoiu moral, no material mai ami,” afirma Manajer CCT munisipiu Ainaru ne’e.
Moises Jose do Rego dehan, intensaun CCT Ainaru husu material hirak hanesan enxada no katana ba Prezidente Republika, atu nune’e distribui ba inan-aman agrikultor hodi hadia sira nia plantasaun atu bele dinamiza kualidade kafe lokal.
“Material sira ne’e ami husu atu fo apoiu ba inan aman sira atu hadia toos atu nunee kafe bele isin di’ak, Moral mak atu husu ba fo formasaun ba komunidade sira atu nune’e labele tesi ai no sunu arbiru,” katak nia.
Entretantu, tinan 2021 ne’e CCT produz kafe hamutuk toneladas rihun 19, la hanesan tinan ida rua ba kotuk, agora kafe nia folin CCT sosa iha terenu folin 0,36 sentavus kada Kilograma, mai iha sentral Aitalu 0,42 sentavus, da-daun ne’e membru CCT iha Munispiu Ainaro hamutuk 50.
Hatan ba prekupasaun ne’e Xefe Kaza Sivil palsiu prezidente republika, Francisco Maroa Vasconcellos, deklara nia reprezenta Xefe Estadu Francisco Guterres Lu Olo sei hatoo ba ministru relevante sira iha liu-liu area ida ne’e nian hodi bele tau matan nune’e kooperativa ne’e la’o nafatin ho di’ak.
“Ita sei hatoo ba ministru relevante sira iha liu-liu area ida ne’e nian hodi bele tau matan nune’e kooperativa ne’e la’o nafatin ho di’ak,” afirma reprezentante Xefe Estadu ne’e iha Ainaru.
Observasaun lafaek news nota iha vizita fatin CCT ne’e xefe kaza sivil prezidensia republika, Francisco Maria de Vasconsellos, Vise MAP, Sekretariu Estadu Profisional no Emprego ho Sekretario Estado. Kooperativa.
Jornalista : Rita Moniz
Editor : Agapito de Deus
