Lafaek News—Ligadu ho situasaun covid-19 ne’ebé la’o namanas iha mundu, autoridade munisípiu Lautém hasai despaixu ba transporte ne’ebé tula pasajeiru husi Lospalos-Dili, labele sirkula iha tempu kalan no tenke sirkula iha loron nune’e hafasil pesoal saúde no polísia kontrola ho di’ak.
Entretantu movimentasaun transporte públiku entre Laospalos ho Dili la obedese ba despaixu ne’ebé autoridade munisípiu Lautém hatoo ona ba Diresaun Transporte Terreste munisípiu Lautém atu hapara bus sira kula iha tempu kalan.
“Administradór rasik hatun orientasaun mai diresaun servisu trasporte terrestre Munisípiu Lautém atu bele orienta transporte públiku sira atu sira bele sirkula iha tempu loron, atu nune bele kontrola di’ak husi ita nia seguransa no pesoal saúde sira tuir protokolu saúde nian,” dehan diretór DNTT Lautém, Edi Correia ba lafaek News iha Lautém foin lalais ne’e.
Edi dehan, bainhira bus Lospalos-Dili kontinua sirkula iha tempu kalan sei aplika multa ba DNTT hahú husi $.9 too 45, bazeia ba kódigu estrada artigu 4 kona-ba orden autoridade nian tenke kumpre.
Tuir deklarasaun balu ne’ebé komandante PNTL Munisípiu Lautém superintendente polísia, António Rego Fernandes, hateten iha loron 3 kuartu ne’e katak bajeia ba reuniaun koletivu komandante PNTL, administradór munisípiu ho DNTT, deside haree mós ba kondisaun sira ho serka sanitáriu iha pontu entradas postu Laivai suspende temporariamente atividade sirkulasaun bus Lospalos Dili hala’o iha tempu kalan.
Jornalista : CE. Lautem
Editora : Nelya Barros