Lafaek News–Diretor ezekutivu Banku Komérsiu Nasional Timor Leste (BNCTL), Brígido de Sousa, afirma BNCTL sei apoiu estudantes Cristal bainhira estudante ida hetan valor di’ak iha ezame nasionál 2022.
Brígido de Sousa hatoo asuntu ne’e hafoin remata serimonia assina akordu entre BNCTL ho Instituisaun Edukativa Cristal-Fundação Cristal (IEC-FC), ho objetivu atu servisu hamutuk.
Ami sei ko’alia ho Reitor Cristal no mos Prezidente Ezekutivu Fundasaun Cristal karik estudante ne’ebé notas ka valór diak sei hetan apoiu husi BNCTL maibé la haree ba estudante nee familia kiik no familia riku,” dehan Diretor Ezekutivu BNCTL Brígido ba jornalista iha Cristal Balide Dili, kuarta 26/01/2022.
Brígido relata, BNCTL iha hanoin ida atu tau liña internet iha IEC-Fundasaun Cristal, maibé haree lai internet nia velosidade, tanba Timor nia liña internet agora seidauk diak (loading kleur) bainhira internet lais ona BNCTL prontu apoiu.
Tinan ida nee ami hakarak foka liu ba area edukasaun hanesan, bolsa estudu, fornese ekipamentu ba Universidade inklui tau liña internet iha universidade núnee estudante sira bele peskiza iha internet,” nia promete.
Koperasaun ne’e BNCTL halo mós ho Universidade sira seluk iha Timor laran hanesan DIT, UNITAL, UNTL no mos IOB, ohin halo assina akordu ho fundasaun Cristal atu disponibiliza servisu bankaria partikularmente husi BNCTL ba Fundasaun Cristal.
Iha fatin hanesan, Vice Reitor ISC, Jacinto Oliveira Junior haktuir, Ohin loron IEC-FC halo assina akorsu ho BNCTL ho objetivu atu halo investimentu ba rai Timor liu husi BNCTL.
Ohin ami iha kompremisiu ida atu orienta estudante no mós dosentes inklui funsionariu sira iha fundasaun Cristal, hahu ohin ba oin atu loke ona konta bankaria BNCTL ninia núnee bele transferensia propinas husi estudante ba Fundasaun Cristal,” Junior esplika
Antes halo akordu ho BNCTL Fundasaun Cristal uza banku estranjeiru nia hanesan BRI, maibé Cristal hanoin hanesan Timor-oan hakarak kontribui liu husi investimentu hodi dezenvolve rai Timor diak liután.
Tuir dadus Total Funsionariu kompostu husi professores no dosentes ne’ebé hala’o servisu iha Fundasaun Cristal hamutuk 500 resin inklui estudante ativu kuaze 7.000 resin husi hirak nee hotu kompostu husi Central Dili, TEKVOK MALIANA, AILEU, SAME, Vikeke Suai, no mós Instituisaun Superior Cristal (ISC) Central, ISC Polo Same, Baukau no mos ISC polo Aileu.
Jornalista :Orlando Magno
Editor : Agapito de Deus
