Lafaek News—Iha kongressu ikus nian rezultadu votasaun kongresista KHUNTO munisípiu 12 ho RAEOA kontinua hatur konfiansa metin ba Armanda Berta dos Santos kontinua lidera Partidu KHUNTO hamutuk ho Sekretariu Jerál foun Elidio de Araújo ne’ebé eleitu husi kongressu.
Amanda Berta dos Santos nudar Prezidente re-eleitu Partidu Kmane Haburas Unidade Nasional Timor-Oan, hamutuk Sekretariu Jerál eleitu, Elidio de Araujo hamutuk lidera partidu jerasaun foun ne’e husi periodo 2024-2028.
Iha diskursu Armanda Berta dos Santos hatoo agradesimentu ba militantes no Kuadrus Partidu KHUNTO, inklui líder másimu José Dos Santos Naimori Bucar ne’ebé fo fiar hodi lidera tan partidu KHUNTO ba periodu tinan haat.
“Ha’u ho estrutura sira de’it mós sei la halo buat bainhira la konta ho ita boot sira buat ne’ebé la di’ak ita presiza buka tuir hodi hatene nia hun iha ne’ebé ,tamba ne’e ha’u husu ba estrutura foun atu servisu makas iha futuru no la bele taka telefone, servisu ne’ebé fó ba ha’u ha’u simu ho responsabilidade atu hare ba ha’u nia emar sira ne’ebé mak sei halerik hela, ita bele dehan katak Partidu Khunto antes to ohin loron hasoru dezafiu oioin, maibé ita hotu iha kometimentu ne’ebé mak di’ak no forte atu kontinua partidu nia polítika hodi hare ba povu nia moris,” prezidente re-eleitu ne’e afirma.
Iha sorin seluk sekretáriu jerál Eleitu Elidio de Araujo iha diskursu, hato’o obrigadu wain ba Kuadrus no militantes Partidu Khunto ne’ebé fo fiar hodi sai Sekretáriu jerál ba Periodu 2024-2028
“Ho imi tomak nia matenek no servisu makas iha treinu, mak ohin loron ita bele realiza Kongresu Partidu Khunto nian ba Dala hat, hodi lori ha’u ho kolega sira simu knaar ne’ebé partidu tula mai ami nia kabas hodi serbí Partidu no povu iha Rai ida ne’e partidu foin mak selebra nia tinan ba 13 maibé ho líder masimu nia karaterístika polítika moral ne’ebé kalma provoka ema wain atu konta no kanta mós Partidu Khunto nia progresu polítika iha palku nasionál,” nia afirma.
Ikus liu Reprezentante Kuadrus no militantes Munisípiu Ermera no Lospalos klarifika katak sira la vota konta ba Prezidente Partidu Khunto Armada Berta dos Santos, maibé sira vota kontra Pakote Sekretáriu jerál Elidio de Araújo.
Jornalista : Mateus F. de Deus
Editor : Agapito de Deus