Lafaek News—Sekretariu Estadu Formasaun Profesionál no Emprego (SEFOPE) liu husi departamentu empregu no orientasaun professionál, Belarmino da Cruz, hatete, servisu SEFOPE iha prosesu rekrutamentu hotu la’o tuir sistema, lahare’e ba juramentu.
“Prosesu haruka ema atu ba Korea ka Australia, ha’u hanoin kolega sira ne’ebé maka tuir hatene hela, nakloke ba públiku ba faze inplementasaun karik iha ne’eba maka balun la kontente ho ida ne’e,” dehan Xefe departamentu emprego Belarmino Da Cruz, hafoin sai oradór hodi selebra loron justisa mundial iha Xanana Rading room, sabado, (20/02/2021).
Xefe departamentu esplika, sistema rekrutamentu nakloke ba públiku hotu, bainhira rejista atu ba Korea do Sul tenke liu husi formasaun lian Korea nian no teste.
“Ba Korea mós sempre iha formasaun ba lian Korea ho durasaun fulan ne’en, pois tuir teste online, iha teste nia laran la autoriza ema ida tama sala laran, representante Timor-Leste ho Koika, teknik istalasaun ninia no alin sira ne’ebé mak atu tuir teste online ne’e,” nia deklara.
Belarmino fundamenta, dala ruma ema dehan la loke ba públiku ne’e iha miss-komunikasaun ituan no lakompriende lolos kona-ba sistema SEFOPE nian.
“Seidauk komprende lolo’os kona-ba sistema hirak ne’e karik, maibé hateten katak ita la’os maromak, dala ruma sidi ituan iha parte inplemetasaun nian, maibé prekupasaun hira ne’e ita ida-idak iha inisiativa rasik hodi nasaun ne’e ba oin,” dehan nia.
Nune’e mós nia informa, Timor-oan sira ne’ebé servisu iha rai liur hahu husi governu Timor-Leste hamutuk ho governu Korea asina akordu iha 2009, to’o ohin loron traballadór hamutuk rihun tolu lima-nulu (3050).
Xefe departamentu hato’o asuntu ne’e liu husi seminar ho topiku ‘politika governu ba igualdade partisipasaun sidadaun sira asesu ba empregu,’ hafoin selebra loron justisa mundial iha Xanana reading room.
Jornalista : Rita Moniz
Asisten Editór : Pedro de Almeida
