Lafaek News—Povu kiik sira esforsu maka’as husi remotas mai too Dili buka osan atu rekupera sira nia ekonomia uma laran, maibé sei hakat liu husi dalan atu hetan dolar ida ka rua iha loron ida nia laran, la’o kesi kabun iha loron manas laran atu responde de’it ai-han bikan ida labele falta iha loron ida.
Maski susar atu hetan rendimentu di’ak iha loron ida, maibé hametin fiar nafatin iha maromak, matebian no lulik sira atu haraik nafatin espíritu forsa no saúde hodi buka osan, fuan la haruka kakutak atu hanoin ambisaun ba riku no fuan la haruka kakutak atu obriga liman rua tane liman, maske ain sei bele forsa atu la’o buka osan.
Haree husi faktu moris nakait kedan ho Avô João Mendonca Gonçalves ho idade 85, obrigadu tenki leba ai-fuan, dadeer san de’it sai hosi nia hela fatin provizóriu Taibesi ba buka osan nune’e bele sosa netik ai han ruma ba neseisdade báziku iha nia familia ne’ebé husik hela iha foho.
Maski todan tanba tenki habai aan iha loron manas ho ai ne’ebé nia leba, maibé tanba de’it nesesidade hodi hatutan moris nia tenki hala’o duni prosesu refere.
Avõ João Mendonca Gonçalves, senti peregrinasaun moris hanesan ai leba todan liután bainhira nia espoza (kaben) husik hela nia mesak tinan Sanulu tenke moris mesak ho osan mean na’in rua kompostu husi mane ida no oan feto ida ne’ebé forma hotu ona família.
Tanba ne’e, hakarak ka lakohi avô João tenki buka rasik moris, maski oan na’in rua iha kbi’it bele haree nia aman, maibé tanba prinsípiu lakohi tane liman ba sé de’it mak kuda metin iha fuan laran, ho pasíensia nia hala’o mesak moris ne’e.
Tuir mai avô João haktuir ba Lafaek News ho oin triste kahur ho matawen ne’ebé habokon nia hasan sorin-sorin katak, ai fuan ne’ebé nia fa’an la’ós sosa tutan maibé nia kuda rasik, bainhira fuan ku’u lori ba fa’an hodi responde ba nesesidade privadu.
“Amboruñus ne’ebé lori ne’e ha’u kuda rasik iha toos, bainhira ema sosa hotu osan ne’e ha’u sosa fali foos. Ha’u lakohi tane liman demais ba oan sira, tanba oan sira mós forma ona família no iha hotu ona oan,” avô João ba LafaekNews foin lalais ne’e besik CCD-Dili.
Nia hatutan, durante loron tolu ona leba más ema ladún hola maibé sei la habaruk nia atu kontinua fa’an, tanba sé la fa’an lori saida mak atu sosa hahan.
Nia reforsa, maski ema ohin loron ladún sosa maibé konsege hetan netik osan uitoan, tanba ohin plástiku tolu mak ema konsege kompra, nune’e ohin loron ka kalan ne’e bele responde nesesidade hodi hein ba loron aban kontinua fa’an fali.
Jornalista : Etelvina D.Sarmento
Editór : Ezequias Tomás
