Lafaek News—Sábadu (15/05/2021) semana ne’e komunidade na’in hitu (7) husi postu administrativu Atauru tula sasan konstrusaun ho ro husi Dili ba Atauru mout iha tasi laran diresaun Atauru-Dili tula material konstrusaun liu kapasidade ró nian.
Iha akontesimentu ne’e, Unidade Polísia Marítima (UPM) hetan fila-fali ema na’in tolu (3), falta na’in haat (4) seluk seidauk hetan, maibé da-daun ne’e autoridade marítima kontinua buka iha tasi area entre Atauru ho Dili.
Xefe suku Beloi postu administrativu Atauru munisípiu Dili, Adão da costa Nunes, informa Atauru–oan nain 7 ne’ebé iha ró laran la konsege too iha fatin determinadu, tanba ró mout iha tasi laran, iha loron 16/05/2021 dadeer Unidade Polísia Marítima buka konsege hetan nain 3, maibé na’in 4 seluk too agora seidauk hetan.
“Ohin dadeer UPM hetan ona ema nain tolu ho naran Nuno, Efren no Tome iha tasi area Dolok-oan, maibé hela sira na’in 4, kompostu husi Francisco, Antonio, Noar, no Rui mak seidauk hetan, tan ne’e, komunidade balun iha ne’e agora sei iha hela tasi laran hodi buka vítima ne’ebé seidauk hetan,” informa xefe suku Beloi Adão ba Lafaek news via telefone, Domingu 16/05/2021.
Autoridade suku Beloi ne’e haktuir, kronolojia husi akontesimentu ho nia istória viajen husi Atauru ba Dili, iha loron sábadu 15/05/2021, oras madrugada komunidade nain tolu husi Atauru ba tula semente saka 50 inklui nesesidade balu iha Dili, nune’e too iha portu Marítima (sional) tuku 7 dadeer tula sasán hirak ne’e hodi arranka fali ba Atauru iha tuku 8 dadeer ne’e, iha tan ema na’in 4 sa’e tan ró hamutuk ho sira nain tolu ne’ebé husi Atauru, nune’e sira na’in 7 mak viajen hamutuk ho ró ne’e, too iha tasi klaran ró baku fila ho razaun semente todan liu fali kapasidade ró nian rezulta sira na’in hitu mout durante loron ida iha tasi laran.
“Sira nain hitu ne’e la’os família uma laran, maibé balun servisu iha Dili mak aproveita sa’e ro ne’e atu mai iha Atauru, Tuir informasaun ne’ebé ha’u asesu sira mai ho sasan konstrusaun no sasan sira seluk tanba todan liu mak ro ne’e mout iha sira,” nia deklara.
Nune’e mos tuir familia ne’ebé akompañia hela vítima na’in tolu, Tome, Nuno ho Efren, ida kanek todan, da-daun ne’e lori ona Ospitál Nasionál Guido Valadares (HNGV), hodi halo tratamentu intensivu.
Entretantu relasiona ho notísia ne’e Jornalista Lafaek News konfirma ho Komandante Unidade Polísia Maritima (UPM), Basilio de Jesus, maibé la konsege fo komentariu, tanba okupadu hela iha terenu hodi kontinua buka ema nain 4 seluk ne’ebé too agora seidauk hetan.
Jornalista : Orlando Magno
Editór : Agapito de Deus
