Lafaek News—Ekipa astronomia nia esperansa ba atividade sira iha Lautém liu-liu iha Com liga ho peskiza ekilipse solar no edukasaun ba komunidade sira sei la’o ho susesu no sei ajuda mos ho klima ne’ebé di’ak.
Asuntu ne’e hato’o husi Secretary General of Southeast Asian Astronomical Network (SEAAN), Academic Staff of Institut Teknologi Bandung (ITB) and Institut Teknologi Sumatera (ITERA) Hakim L Malasan iha Palásiu Prezidensiál Nicolao Lobato Bairo Pite, tersa (18/04/2023) bainhira ho ekipa Vietnam, Bruney Darusalam, Indonesia remata sorumutu ho Xefe Estadu José Ramos-Horta.
“Ekipa astronomia esperansa ba aktividade sira iha Lautém liu-liu iha Com liga ho peskiza no edukasaun ba komunidade sira sei lao ho susesu no sei ajuda mós ho klima ne’ebé di’ak, ita nia prezensa iha Lautém espesialmente iha Com sei fó edukasaun di’ak ba komunidade sira no sei orienta atu komunidade sira haree eclipse solar total ho kondisaun ne’ebé diak bele aproveita hodi sente nakukun ne’ebé akontese tamba fulan taka tomak loromatan, ne’e hanesan experiensia natural no umanu ne’ebé ema ida-idak sei sente no bele sai hanesan referensia ba aban bainrua”, informa Secretary General of Southeast Asian Astronomical Network (SEAAN), Academic Staff of Institut Teknologi Bandung (ITB) and Institut Teknologi Sumatera (ITERA) Hakim L Malasan ba jornalista sira iha Palasíu Prezidensiál ( 18/04/2023).
Entretantu Secretary General of Southeast Asian Astronomical Network (SEAAN) afirma, Aktividade ne’ebé sei halo mak peskiza kona-bá Eclipse Solar ne’e rasik no mos sei iha aktividade edukasaun ba komunidade sira no iha momentu ne’eba astronomia sira sei fahe matenek ho komunidade sira no halo análise klean ba situasaun eclipse solar total ne’e rasik.
“Rezultadu husi peskiza ba Eclipse Solar Total iha Timor-Leste sei lori ba halo apresentasaun iha sorumutu internasionál ne’ebé sei akontese iha fula Agustus iha nasaun Japaun,” nia sublina.
Nia sublina katak ema hotu iha nivel konesimentu no pasensia ne’ebé diferente ka la hanesan tamba ne’e bainhira ema utiliza oklu eclipse solar tenke tuir estandar operasionál ne’ebé iha nune’e labele afeita ba ema nia matan hanesan saida mak akontese iha Vietnam 1995 no Indonézia 2016 no 2019.
Entertantu, tuir astronomu sira haree katak Prezidente Repúblika José Ramos-Horta nia visaun ba Eclipse Solar total iha Timor-Leste luan tebes no Xefe Estadu haree ida ne’e husi parte umanidade liga ba sosial kultura ne’ebé hariku tebes ema nia moris no atu lori mos lisaun di’ak ida katak akontesimentu natural sira nune’e ema labele hare deit husi parte siensia nian maibé oinsa mak atu estuda no hare direita reasaun kultural ne’ebé iha.
Iha okaziaun ne’e parte agradese ba povu Timor-Leste ne’ebé simu ekipa prezensa ho diak, no hein katak amizade ne’e sei lori rezultadu pozitivu to’o iha loron ne’ebé ema hotu hein atu asiste eclipse solar total iha Timor-Leste. Ami sei ajuda fahe konesimentu no matenek atu ema hotu bele aproveita hare Eclipse Solar Total ho di’ak.
Jornalista : Rita Moniz
Editór : Agapito de Deus
