Lafaek News-Ainaro-Asidente ba kamioneta ida ho xapa matrikula 54-327-TL, diresaun Suai Ainaro too iha Jakarta II Builiko Suku Ainaro villa, kamioneta ne’e forsa lakon iha dalan sa’e aranka aseledor la konsege ultra pasa no halai ba kotuk hodi baku fila rezulta ema nain rua kanek todan, nain 6 kamaan, nain 10 kondisaun diak.
Asidente refere akontese iha tuku 9 kalan (OTL), bainhira kamioneta ne’e tula karau 2 no ema nain sanulu resin ulau (18) inklui ho motorista, husi Suai Labarai ba Ainaro ho objetivu atu halo serimonia ida iha palasiu KORK Ainaro.
Motorista Eduardu Tilman hateten husu Munisipiu Suai tula karau atu lori ba hatun iha Seremonia Ida iha istana KORK, maibe to’o iha area Jakarta 2, derepente de’it iha dalan subida ne’e kareta sa’e labele ikus mai baku Fila
“Ami tula karau husi Suai mai atu ba istana KORK, too tiha Jakarta dua dalan sa’e maka’as ne’e derepente kareta forsa lakon hakiduk fali ba kotuk baku fila,”haktuir motorista kamioneta ne’e.
Motorista relata husi ema nain 18 inklui, nain rua mak kanek todan, nain 10 kanek ladun todan, sira seluk kondisaun diak inklui ho karau 2 ne’e kondisaun di’ak hela.
Entretantu, asidente refere parte Polísia Tránzitu Munisípiu Ainaro, simu direta informasaun husi komunidade sira, rona tiha novidade husi populasaun area refere, PolTránz too kedan iha fatin akontesimentu hodi identifika motive husi asidente ne’e.
Iha prosesu identifikasaun PolTránz Ainaro nota motorista ne’ebé lori kamioneta refere iha karta kondusaun kategoria B1.
Tuir lolos Motorista nia karta kondisaun C1, maibé nia karta kondisaun B1, signifika katak nia labele lori kareta boot,”haktuir PolTranz Ainaro ne’e.
Ema nain rua ne’ebé kanek todan inklui ho sira ne’ebé kanek kma’an evakua kedan ba palasiu KORK hodi hala’o tratamentu liu husi medikamentu tradisional.
Kontribuitora : Sarah Lewis
Editor : Agapito de Deus
