LafaekNews –Akontesimentu ohin dader maiz ou menus oras tuku 9 dader, akontese asidente baskolante ho xapa matrikula 54.261 TLS, baku fila iha suku Horai Kiik, Postu administrativu Maubise, munisípiu Ainaru, rezulta ema sanulu nulu resin neen (16) kanek todan no sanulu resin ualu hetan kanek kamaan (18), tanba ba hafolin feto Iha Minisípiu Ainaru.
Tuir komandante Munisípiu Ainaru, Superintendente, Justino Menezes, esplika, Kronolojia akontesimentu ne’e kareta baskolante ho xapa matrikula 54.261 TLS, ne’e tula Ermera oan hamutuk tolu nulu resin haat (34), kompostu husi mane 25 no feto na’in 9, horseik 01/09/2021 mai husi postu administrativu Letefoho munisípiu Ermera ho objetivu atu hafolin feto iha Ainaru ohin atu fila hika ba Ermera mak hetan asidente refere.
“Kronolojia akontesimentu ne’e kareta baskolante Kareta ho xapa matrikula 54.261 TLS, ne’e tula Ermera oan hamutuk tolu nulu resin haat (34) kompostu husi mane 25 no feto na’in 9 iha horseik 01/09/2021 mai husi postu administrativu Letefoho munisípiu Ermera ho objetivu atu hafolin feto iha postu administrativu Hatubuiliko munisípiu Ainaru, ohin sira fila mak hetan Dezastre ne’e iha suku Horai kiik postu administrativu Maubise munisípiu Ainaru, atu fila hika ba Ermera mak hetan asidente,” dehan komandante Munisipiu Ainaru Superintendente Justino Menezes ba Lafaek News via telefne,Kinta 02/09/2021.
Komandante ne’e esplika, Motivu husi akontesimentu ne’e tanba sira fila husi hatubuiliko ba Ermera mak motorista baskolante la kontrola aan halai kareta ho velosidade ne’ebe aas hodi soke deker iha estrada ninin mak kareta bakufila soe aan kuaze metru rua husi estrada.
Hafoin akontesimentu ne’e akontese autoridade seguransa liu husi polisía eskuadra postu adminitrativu Maubise too kedas fatin akontesimentu ajuda vitima sira hodi transporta kedas ba óspital referal Maubesi tanba ema na’in 16 kondisaun grave no 18 kondisaun kmaan mate la iha, Justino Deklara.
Jornalista :Orlando Magno
Asisten Editór: Egidio Nono
