Lafaek News—Arse Bispo Metropolitana Dili Cardial Dom Virgilio do Carmo da Silva SDB, husu sarani liu-liu Padre no Madre Sira atu kontinua haburas esperiensia moris maktoban Pe. Domingos da Silva Soares “Maubere” nian ne’ebé iha domin boot ba povu no rai Timor Leste.

 “Maktoban Padre Domingos da Silva Soares ne’ebe hatudu nia domin ba ema kiak sira no kbiit laek sira, nudar Timor oan nia hadomi rai ida ne’e, amu  Maubere, oan ne’ebe fo an tomak ba rai ida ne’e ita haree iha kondisaun ne’ebe difisil loos nia lahaluha reza ba rai Timor atu sai diak liután no ba luta nain sira atu dezenvolve rai no povo,” Cardial Dom Virgilio do Carmo da Silva SDB iha omilia misa ikus ba Maktoban Padre Domingos da silva Soares iha paroqia Katedral Dili, 19/05/2025

Iha missa ikus ba saudozu Pe. Domingos Maubere, Cardial Dom Virgilio, haktuir fali MaktobanPadre Domingos da Silva Soares nia prosesu moris ne’ebe fo domin bo’ot ba sarani no halo mos orasaun ba Rai Timor, husu ba sarani no padre madre sira atu haburas nafatin esperensia moris Padre Domingus da silva Soares nian no mos hala’o istoria ba jerasun foun sira.

“Amu Maubere obrigadu ba ita nia domin ba rai no ba povo ida ne’e, ba iha lalehan kontinua harohan mai ami hodi proteze ami moris iha unidade  lori Timor oan sira sai husi kiak no mukit, no lori ami ba dame no ksolok, buat ne’ebe ita halo ba ita nia an rasik ba ema sira sei hela ba nafatin ba Jerasaun no Jerasaun sira tuir mai, amu lulik Amu bispo madre sira atu kontinua hamoris espiritu ne’ebe nia husik hela, hakerek nia istórika atu konserva hela ba Jerasaun sira tuir mai, Amu Du oin ba oin sei la hamutuk tan ho ita nia sei la hakilar tan ita,” Dom Virgilio haktuir.

Saudozu Padre Domingos da Silva Soares moris iha suku Dukurai postu administrativu Letefoho, munisipiu Ermra, iha loron 12 fulan Maiu tinan 1952, no hakotu nia is iha loron 16 Maio 2025, hafoin misa hotu sarani sira akompanha Maktoban Padre Domingos da Silva Soares nia isin mate ba semitériu Maloa Ailok-Laran hodi haloot iha fatin deskansa ikus rohan laek nian.

Jornalista : Maria José /Jonaida Corte Real