Lafaek News—Autoridade Protesaun Sivil (APS-sigla Portugués), Tersa 18/06/2024, João de Sousa Filipe, relata hahú iha loron 10-17 fulan Juñu 2024, APS rejistu tipu dezastre hamtuk 55 no mate na’in 2 ho total númeru uma kain estragus 50 ne’ebé hetan estragus husi dezastre naturais.
Nia dehan, dezastre naturais ne’ebé akontese iha territoriu Timor-Leste, liuliu iha munisípiu sira mak hanesan Ainaro rai halai estragus uma 2 no rai nakdoko estragus uma 1, Baucau anin sobu uma 5, no ahi han uma 1, Bobonaro rai halai estragus uma 3, Covalima bee sa’e tama uma 33 no rai halai estragus uma 2, Dili ahi han uma 1, Ermera anin sobu uma 1 no rai halai estragus uma 1, Manufahi anin sobu uma 1, Lautem, konflitu sosial entre ema ho animal mate 1, Liquisa mate 1, Viqueque ahi han uma 1, inklui Raeoa ahi han uma 1 no anin sobu uma 1.
“Husi dezastre naturais ne’ebé akontese iha territoriu Timor-Leste, iha tipu tolu mak hanesan rai halai, ahi han uma no anin sobu uma, husi ne’e, parte komandu Autoridade Protesaun Sivil munisipiu ho parseiru relevante sira fornese asistensia emerjensia ba familia afetadu sira mak hanesan ai han no laos ai han (food item no non-food item), tanba dezastre naturais ne’e rasik, ema lakon vida 2, husi ne’e, total númeru familia afetadu hamutuk 55, ne’ebé akontese iha munisipiu sira ne’ebé mak iha territoriu Timor-Leste”. Informa Porta-vos João de Sousa Filipe, ba jornalista sira iha konferénsia imprensa, Tersa 18/06/2024.
Porta-vos APC ne’e haktuir, vítima sira ne’ebé hetan estragus husi dezastre naturais komandu operasaun APC servisu hamutuk ho presidente autoridade munisipiu sira kontinua halo hela levantamentu detallu kona-ba sasan ne’ebé estragus no lakon.
“Ita haree númeru frekuénsia ne’ebé bo’ot liu mak bee tama uma hamutuk 33, no rai halai iha uma kain 7, ahi han uma iha uma kain 4, nune’e mós númeru afetadu ne’ebé mak foin lalais evakua hamutuk 55, durante semana ida nia laran”. Porta-vos haktuir.
Autoridade Protesaun Sivil apela ba komunidade hotu, karik akontese anin bo’ot ruma husu komunidade atu hases-an husi fatin risku sira hanesan mota ninin, foho lolon, ai-hun bo’ot, liña eletrika, rai dukumentus importante iha fatin ne’ebé seguru. Nia hakotu.
Jornalista : Crispin de j. Amaral
Editor : Agapito de Deus
