Lafaek News–Laiha kampu traballu ba foinsa’e sira, Alumi-Israel Arava International Center for Agriculture Training (AICAT), ho inisiativa hari’i grupu ida ho naran Sentru Foin Sa’e Agrikultura Laclo (SEFOSALA) iha loron 18 fulan Abril 2021, lokaliza iha Bilou-waik, Aldeia Readodok, Suku Laku-mesak, postu-administrativu Laclo, munisipiu Manatuto.
Alumi-Israel AICAT Justinho M. de Carvalho hanesan koordenador grupu hatete, Grupu Sentru Foin Sa’e Agrikultura Laclo hanesan sentru ba foin-sae Laclo oan tomak hodi aprende hamutuk kona-ba siénsia agríkola no prátika direita iha kampu traballu atu hasae produsaun agrikola hodi aumenta rendimentu Familiar no sustentabilidade ekonomia familiar nian.
Ami foinsa’e rua-nuluresin rua (22) nia objetivu kria grupu ne’e atu fo servisu ba foinsa’e no ba ami nia a’an hodi sustenta ba nesesidade ekonomia familiar nian,nomos liu husi kria grupu ne’e hodi fasilita foinsa’e sira nia hanoin kritiku no inovativu ho kriatividade ba sustentabilidade ekonomia familiar nian,” dehan Justinho ba lafaek news via telemovel, tersa (14/06/2022)
Nia haktuir tan,nu’udar foin sa’e laclo ho inisiativa hodi kria grupu voluntariu ida ne’e hodi fó kapasitasaun ba foin sa’e sira ne’ebè iha interese hodi kompete iha merkadu traballu, ho atividade agrikola ne’ebé iha, bazeia ba siénsia agrikola no teknojia ne’ebé hetan husi estudu iha kampu traballu Israel.
Ohin loron ami foinsa’e laclo servisu voluntariu ba rai ida ne’e nia futuru, liuhusi atividade agrikultura bazeia ba skill no koñesimentu ne’ebé ami hetan iha nasaun israel, liuhusi siénsia agrikola no teknolojia hodi aprofunda no prontu investe iha kampu traballu tuir siénsia no teknolojia global ne’ebè mundu adopta. Tanba ne’e motiva tebes ami hodi kria grupu ida ne’e, hodi fó kapasitasaun voluntariu ba foinsa’e sira ne’ebé iha interese atu aprende hodi kompete iha merkadu traballu no foinsa’e sira bele kria rasik servisu ba sira nia a’an iha futuru” haktuir nia
Nia dehan tan Bazeia konstituisaun Repúblika Demkràtika Timor-Leste (K-RDTL), ne’ebé konsagra iha artigu 19,aliña un(1) koalia kona-ba (klosan sira) ne’ebé hatu’ur iha aliña un (1) hateten: Estadu foti no fó brani ba mane-klosan no feto-ran sira,ati sira bele hakuak metin unidade nasional,bele hari’i fali tuba no haburas nasaun ne’e. Tanba ne’e foin sa’e sira ho lian ida,ho asaun ida, hodi halibur hamutuk iha grupu ida,hodi kontribui ba dezenvolvimentu nasional iha Timor-Leste.
Tuir matenek nain ida ho naran John Kennedy hatete labele husu ba o nia nasaun, saida mak nasaun fo ba ita,maibé husu ba ita nia aan,saida mak ita fo ba ita nia nasaun”, hakotu Justinho
Estajiadu : Felipe Soares
Editor : Agapito de Deus
