Lafaek News—Estrutura Assosiasaun Jornalista Timor Loro sa’e (AJTL) hamutuk ajénsia internasional OXFAM iha Timor Leste, organiza media tour ba jornalista sira hodi hala’o kobertura liu-liu asuntu mudansa klimátika ne’ebé lori impaktu ba komunidade sira iha baze munisípiu Ermera no RAEOA.
Jerente OXFAM, Adilson da Costa informa objetivu husi media tour ne’e atu organiza jornalista sira hodi hala’o kobertura ba asuntu mudansa klimátika ne’ebé fo impaktu negativu tebes ba populasaun iha baze liu-liu Ermera ho Oe-kusse.https://www.lafaeknews.tl/oxfam-tl-ho-media-lafaek-news-organiza-jornalista-kobertura-asuntu-agrikultura/
“OXFAM servisu hamutuk ho AJTL n’ee atu fasilita jornalista sira hodi halo kobertura kona-ba informasaum sira ne’ebe liga ba mudansa klimátika no oinsá ninia efeitu liu-liu ba komunidade sira partikularmente ba feto no ema ho defisiénsia sira dala-barak sai vulnerável liu, bainhira akontesimentu krize klimátika iha Timor Leste,” katak Adilson da Costa ba jornalista sira iha edifisiu Oxfam foin lalais.
Adilson fundamenta, programa media tour ho naran turizmu ambiental ninia objetivu atu aumenta koñesimentu jornalista sira nian no membru organizasaun estadu sívil, joven dijitál sira atu bele explora no mos oinsá buka hatene informasaun sira iha baze liu-liu areas ne’ebé sai alvu ba implementasaun ba media tour ida ne’e.
“Tuir planu ne’ebé ami halo hamutuk ho AJTL, katak media tour ne’e sei halo iha munisípiu Ermera no mos RAEOA, jornalista sira halo viajen ohin (20/02/2023), sira halo programa kobertura durante loron tolu ka loron haat iha munisipio rua ne’e,” Adilson afirma.
Nia dehan, iha media tour ne’e importantes hodi transforma fila-fali ba governante sira bainhira povu fo konfiansa hodi ukun, jornalista sira sei lori informasaun sira husi komunidade sira no explora informasaun sira ne’ebé iha matenek lokal ne’ebé komunidade uza hodi rezilente hasoru klimátika liu-liu konservasaun bee ne’ebé involve mos joven feto-mane, ema ho defisiensia no organizasaun komunidade sira iha baze.
Iha sorin seluk, Prezidente Assosiasaun Jornalista Timor-Leste (AJTL) Zevonia Vieira, reforsa media tour ne’e nia materia prinsipal ba jornalista sira no asuntu sira ne’e importante ba governu kona-ba mudansa klimátika ne’ebé komunidade hasoru iha baze.
“Media tour nee kolega jornalista sira bele halo sira nia servisu ho didiak nunee mos foka liu asunto ba ema vulneravel sira hanesan feto no labarik sira neeba mak hetan impaktu hanesan klimatila,espera katak bele fo espasu ba lian laek sira atu hatoo sira situasaun no preokupasaun na estadu nune’e oinsá mak bele fo solusaun mak diak bainhira ita iha situasaun hasoru krize klimatika iha global no mos inklui Timor-Leste,” Zevonia hakotu.
Entretantu, media tour ne’ebé AJTL no OXFAM organiza tinan ne’e ba dala rua ona, hanesan iha munisípiu Ainaro postu administrativu Hato-Udo no munisípiu Manatutu no tinan ne’e foku iha munisípiu Ermera ho Rejiaun Administrativa Espesial Oe-kusse Ambeno.
Jornalista : Arnaldo Nunes
Editór : Agapito de Deus
