Lafaek News—Ema hotu hatene Ainaru nu’udar munisípiu ne’ebé riku produtu lokál liu husi postu administrativu Hatu-builiku ho Maubisse, maibé agrikultor sira okupa fali estrada ninin hodi faan produtu lokál.
Maske, restaurasaun Independénsia Timor Loro sa’e, hanesan labarik ida karik tama ona joven, laiha tan razaun atu koa’alia husi ibun-ba ibun katak Timor foin ukun an, iha ne’ebé Orsamentu Jerál Estadu hasai husi fundu petrolíferu nian gasta la tuir kondisaun haluha nesesidade populasaun nian iha baze.
Kondisaun merkadu munisipál Ainaru too ohin loron la reprezenta munisípiu no hasusar tebes povu agrikultor nia produtu lokál atu lori ba demonstra iha merkadu, maske produtu ho kualidade di’ak, maibé merkadu laiha kondisaun atu fasilita tau produtu lokál iha fatin dignu atu ema bele sosa, pasiénsia negosiante sira tenke okupa estrada hodi hatudu sira nia produtu lokál katak Ainaru nia modo mak ne’e bele sosa.
Nakait ho preukupasaun estadu ho negosiante kiik nian iha munisípiu Ainaru, sadik tebes sira ne’ebé mak kaer ukun iha kraik buka malu fo hanoin ba malu hodi resolve preukupa rua entre estadu ho negosiante kiik sira ne’ebé da-daun okupa hela estrada hodi fan produtu lokál.
Xefe povosaun no ho xefe suku Autoridade sira alerta bebeik ona komunidade atu labele okupa estrada ninin, hanesan fatin ba negósiu fa’an produtu lokál, tanba risku ba vida maibe, atu sustenta moris ba loron naruk nian obriga povu kiik sira tenki okupa estrada ninin, halibur produtu ba fa’an hodi hetan osan sosa fos hodi hatutan moris loron-kalan.
Manuela Mendonça no Rosa Fátima negosiante produtu iha estrada ninin merkadu Aituto hateten maske estrada ninin fó risku ba ema nia vida, maibé hetan rendimentu di’ak, obrigatóriamente tenki okupa fatin ne’e tanba laiha ona fatin seluk ba sira
“Fátin ba ami atu fán sasán laiha, tanba ne’e ami tenki fa’an ami nia produtu lokal iha de’it estrada ninin, tanba sosa nain sira bele sosa lalais maske fatin ne’e risku mai ami negosiante’’. hateten negosiante sira iha Aituto-Rina suku Mulo, Posto Administrativu Hato-Builiku, Munisípiu Ainaro.
Justino de Orleans Maia Lopes, mos nu’udar negosiante dalan ninin merkadu Aituto-Rina husu Governu atu tau merkadu Aituto iha fatin ne’ebé seguru tanba besik estrada ninin fo risku ba negosiante sira nia vida
“Husu ba Governu atu tau merkadu Mulo iha fatin ne’ebé mak seguru, atu nune’e labele fó risku ba Negosiante no mos kompradores sira nia Vida”. negosiante Justino de Orleans Maia Lopes husu
Alende ne’e tuir Xefe Aldeia Mulo Paulino de Jesus klarifika, antes ne’e autoridade sira bolu atensaun bebeik ba negosiante merkadu dalan protokolo Aituto-Rina maibé komunidade sira kontinua no la iha konsiensia, hodi kuntinua fa’an produtu iha estrada protokolu refere.
“Negosiante sira ne’ebé mak fá’an sira nia produtu iha estrada ninin ne’e husi Administrádor fó ona karta xamada atu se’es husi fatin ne’e , tanbá fatin ne’ebé mak atu konstrui merkadu ne’e komunidade sira la fó gratuita, ami hala’o ona enkontru ba dala-3, maibe seidauk hetan solusaun tanbá ne’e mak komunidade sira lakoi atu ba fáan sira nia produtu iha uma ne’ebé mak konstrui ona, sai hanesan merkadu, maibe informasaun kada loron sexta sempre fó sai ba komunidade sira, atu nune’e labele fán produto iha estrada protokolu nian, maibé Komunidade sira la iha Konsiensia nafatin fán iha estrada ninin’’.Xefe Aldeia Mulo Paulino sublina.
Maske nune’e maibe komunidade Suku Mulo kontinu Fa’an t sira nia produto iha estrada protokolu Suku Aituto Posto Administrativo Hato-Builico, Munisípio Ainaro tanba laiha fatin seluk ba negosiante sira atu halibur produtu ba faán
Jornalista : Sara Orluli News
Editor : Agapito de Deus
