Bobonaro-(Lafaek News)—Brigada operasionál Autoridade Inspesaun Fiskalizasaun Atividade Ekonomia Sanitaria no Alimentar (AIFAESA), kinta (26/11/2020), prende produtu liu-prazu serveza Liurai lata 12 inklu Schweppes lata 14 iha Otel Pousada Balibo postu administrativu Balibo, munísipiu Bobonaro.
Iha atividade operasaun ne’ebé lidera husi Xefe Brigada Inspetur, Jessio Malkias no hetan apoiu husi PNTL eskuadra Balibo konsege prende tan sasán balun ne’ebé liu ona prazu hanesan santan kelapa plástiku 1, Mostarda masa 1, mie sedaap plástiku 62, tictac plástiku 5, Coca-Cola kalen 22 no Sprite kalen 6.
Iha fatin hanesan, Luisa nu’udar jestora ba Otél Balibo, rekoñese AIFAESA prende duni sasán ne’ebé liu ona prazu iha otél Balibo Four.
“Antes AIFAESA mai halo kontrola Otel Balibo, maibé ami prepara antes ona, tanba da-daun ne’e ami haree tiha ona ami nia sasán sira ne’ebé prazu ona, ami seidauk soe ami sei rai ketak hela sasán sira ne’ebé mak iha ami nia otél,” deklara Luisa ba jornalista sira hafoin brigada operasional AIFAESA halo inspesaun iha Otél Balibo, kinta (26/11/2020).
Jestora Otél Bailbo ne’e haktuir, sasán hirak ne’ebe prazu ona koloka ketak atu nune’e sei hatudu fali ba patraun atu bele hatene sasán, tanba patraun sempre halo kontajen ba sasán ne’ebé ema sosa ona no seidauk sosa.
Jornalista : Etelvina Sarmento
Editora : Nelya Barros
