Lafaek News–Reitór universidade da Paz, Adolmando Soares Amaral, sujere governu atu estende tan fornesimentu programa sesta bázika tanba populasaun iha territóriu barak seidauk asesu.

“Tanba ne’e ha’u dehan program ne’e di’ak maibé jestaun ba distribuisaun ne’e mak ladi’ak, governu la halo jestaun kontrolu ka la halo liña kordenasaun di’ak ho emprezáriu sira ne’ebé halo distribuisaun refere hodi bele grante nia efetividade no efikasia,” dehan Reitór Universidade da Paz, Adolmando Soares Amaral, iha nia kna’ar fatin Manleuna kinta (04/03/2021)

Reitór ne’e salienta katak orsamentu ba programa  sesta bázika hamutuk millaun 75, governu liu husi emprezáriu foin ezekuta $.700 mill, maske tuir planu distribuisaun sesta bázika termina iha fulan fevereiru 2021, maibé presiza estende atu nune’e bele kobre teritóriu laran tomak.

Maske program ne’e di’ak maibé ba nia prosesu implementasaun kestionavél tebes tanba pior liu iha aldeia ho suku balu  hetan ona distribuisaun refere, maibé balu mós seidauk asesu, tan ne’e governu presiza iha kontrulu ne’ebé di’ak atu labele hamosu failansu hirak ne’e.

“Tuir lo-loos governu tenke fó órden ba emprezáriu sira katak, kalendáriu mak ne’e, iha suku ida ne’e semana  rua  tenke finaliza, mas governu la halo ida ne’e, governu aprova orsamentu refere, loke hela kontratu depois emprezáriu ne’ebé manan sira rasik halo kalendariu ba distribuisaun, tan ne’e problema, kuandu emprezáriu mak halo entaun sira tenke buka produtu lokál kombina ho produtu importasaun foin bele halo distribuisaun, ba produtu importasaun ne’e di’ak, maibé produtu lokál, sira tenke ba halibur husi munisípiu ida ba munisípiu seluk, tan ne’e difikulta ba prosesu distribuisaun,” katak reitór ne’e.

Bainhira governu fó ona deadline katak distribuisaun sesta bázika ne’e sei hotu iha fualan fevereiru, presiza hatene ezekusaun 75 milloes ne’e atinje ona pursentu no ema na’in hira mak asesu ona ba sesta bázika ne’e.

“Maibé realidade levantamentu atu selu emprezáriu ka tagihan ne’ebé emprezáriu sira halo iha ministeriu finansa foin atinje porvolta ne’e 700 ital mill seidauk to’o 1 millaun, osan ne’ebé prepara 75 milloens, emprezáriu sira ne’ebé distribui sesta bázika foin ezekuta de’it 700 mill, entaun 74 ital milloens ne’e atu halo saida, governu tenke halo esplikasaun,” tenik nia.

Jornalista : Felisberto da Costa Fernandes

Editora     : Nelya Barros