Lafaek News—Kuarta (17/03/2021), kandidatu administradór foun ba munisípiu Kovalima, Francisco de Andrade, ofisialmente simu pose husi Ministru Administrasaun Estatal (MAE), Miguel Pereira de Carvalho, hodi sai bibi atan ne’ebé tane ema hotu ekelibriu no halo tuir orientasaun husi governu sentrál.
Ministru Administrasaun Eatatál (MAE), Miguel Pereira de Carvalho informa, administradór foun munisípiu kovalima hanesan reprezentante governu iha Kovalima ho dirize administrasaun Kovalima atu asegura funsionamentu servisu iha administrativu lokal kovalima no responde ba atividades hotu.
“Ha’u lori primeiru ministru Taur Matan Ruak nia naran fo pose administradór munisípiu Kovalima nian no Servisu ne’ebé administradór foun sei halo ne’e todan tanba ezije ninia esforsu atu servisu no tane ema hotu iha ita boot nia liman,” dehan MAE Miguel ba jornalista iha Salaun enkontru STAE Kaikoli Dili, kuarta semana ne’e.
Miguel esplika, serimónia tomada de pose ne’e tuir planu atu realiza iha munisípiu Kovalima, maibé ba da-daun iha situasaun estadu emerjénsia no serka sanitária obrigadu tenke hala’o de’it iha iha Dili.
Administradór Kovalima atu hadia efikasia no efisiénsia ho profisionalizmu iha administrativu lokal kovalima nian ba iha administrasaun públiku ne’ebé di’ak liu sai hanesan fatór ofisial implementasaun polítika no programa dezenvolvimentu governu daualu nian.
Administradór foun Kovalima sei dirize no ezerse orden ne’ebé governu sentrál deskonsentra ona iha munisípiu kovalima, nomeadamente dominou iha area edukasaun, Saúde no seguransa alimentár, agrikultura jestaun merkadu no turizmu.
Administradór Kovalima sei garante populasaun iha Kovalima, sei hetan atende saúde ne’ebe di’ak husi postu saude sira, kanalizasaun saneamentu bee-moos ba komunidade sira ho adekuadu, halo vasinasaun ba animal no mós kompeténsia seluk.
Programa munisipál labele haketak aan husi programa nasionál nian ne’ebé trasa ona iha planu estratéjia dezemvolvimentu nasionál nune’e labele hamosu diskuntánsia.
“Ha’u dezafia ba administradór foun munisípiu kovalima atu konsentra ita nia matenek no esperiénsia atu servisu hamutuk ho entidades no funsionáriu sira hotu hodi dezenvolve ita boot sira nia munisípiu,” Miguel rekomenda.
Entretantu, imposadu administradór munisípiu Kovalima Francisco de Andrade, promete sei prontu atu halo tuir ordem hotu ne’ebé fó sai husi governu sentrál.
“Ha’u labele promesa ha’u nia planu iha ne’e tanba ami nia ekipa iha ne’e planu ne’ebé prioridade mak bee, eletrisidade no estrada, ha’u mos prontu halo tuir orden husi governu sentrál ne’ebe fo mai ha’u hanesan ohin Ministru Administrasaun Estratal dehan ona,” administtradór foun ne’e argumenta.
Obervasaun lafaek news nota katak iha serimónia toma de posse ne’e entidades ne’ebé partisipa hanesan Membru Governu balu, membru parlamentu nasionál inklui ho família imposadu administradór munisípiu kovalima.
Jornalista : Orlando Magno
Editora : Nelya Barros
