Lafaek News—Abel Maia ho nia kaben Anariza da Silva ho oan nain hitu (7) kompostu husi feto nain 3 mane nain 4, hanesan uma kain ne’ebé hetan evikasaun hosi Fomentu II hosi Sekretaria Estadu Asuntu Toponomia no Organizasaun Urbana (SEATOU) ho razaun okupa fatin risku ba mota Komoro.
Ho governu nia polítika liu husi SEATOU obrigatória komunidade sira ne’ebé harii iha uma fatin risku hanesan mota ninin, rai hun inklui okups espasu públiku nian tenke muda atu governu bele halo dezenvolvimentu diak no hafurak sidade Dili sai nudar sidade ne’ebé reprezenta Timor Leste iha mundu internasional nia matan.
Abel ho nia kaben ho oan sira hela iha Fomentu komesa iha tinan 2019, maibé derepente governu tenke muda sira husi fatin risku, nune’e, Abel ho nia kaben Anariza da silva kous no dada oan nain 7, tenke evakua ba ponte CPLP nia okos hodi hamahan an tempu balun nune’e atu hein governu transporta sira fila fali ba ida-idak nia munisípiu,
“Ami hela Fomentu iha tinan 2019, maibé komunidade nebe hela iha mota ninin mai hosi Bobonaro Suai no Ermera, Governu mós fasilita kareta tula balun ona ba ona sira nia munisípiu, hela de’it ha’u ho oan no ferik oan mak seidauk ba,” hateten Abel Maia iha intrevista ho Lafaek News iha Ponte CPLP nia okos, Kuarta (08/01/2025).
Abel Maia haktuir, nia orijen husi aldeia Liabe, suku Baboi-Kraik, postu administrativu Atsabe, munisípiu Ermera, nia oan nain 7 ho nia kaben hein hela governu atu transporta sira fila ba Atsabe hamutuk horik ho familia sira iha Atsabe.
“Governu informa ami atu dehan hatama dokumentus ba obras públika rai hodi rejistu konta bankária, ha’u nia oan na’in hitu, na’in haat eskola iha Manleuana, maibé sira sei eskola sementara lai, depois urus surat pindah, hein indimnizasaun ne’e lakon tempu liu, labarik sira la ba eskola no ha’u mos la ba pineira rai-henek,” haktuir Abel.
Abel ho Anariza da silva, nia oan nain rua sofre isin mana, tanba hetan atake husi sukuk iha okos ponte CPLP durante loron tolu ona, maibé laiha osan atu sosa aimoruk hod ikura isin-manas ne’ebé nia oan nain rua sofre, bainhira atu hetan osan tenke pineira rai-henek.
“Loron tolu ona la hetan osan tanba sibuk muda sasán no no antes ne’e Governu mai tau sinal mean no foti dadus kona-ba medida uma, no uma halo ho saida reboka ka lae, taka kramik ou lae ? ida ne’e mak Governu foti ona, maibé too hasai ami tooo agora hahán ruma atu ajuda ami mós laiha, iha de’it lona 10, maibé ami la hetan, totál uma ka’in 200 resin,” vitima hosi eviksaun urjénsia ne’e reafirma.
Tuir informasaun ne’ebé Lafaek News asesu hosi fontes kredivel balun katak, eis Primeiru Ministru oitavu governu konstitusional, Jeneral Taur Matan Ruak, fo tulun ona foos saka 1, supermie dos 1, ho mina litru 5, inklui ho terpal ida ba uma kain Abel Maia ho nia kaben Anariza da Silva hodi taka baluk nune’e bele satan anin no susuk iha ponte CPLP nia okos, nune’e iha mos informasaun adisional katak familia uma kain balun sei fo tulun nesesidade bázika ba komunidade afetadu sira ne’ebé da-daun iha okupa provizóriu Ponte CPLP nia okos.
Jornalista : Acacio Pinto
Editor : Agapito de Deus
