Lafaek News—Televizaun husi Australia Broadcasting Cooperation (ABC) hakarak materializa kooperasaun ho Radio Televizaun Timor Leste (RTTL) no mídia privadu hotu.
Asuntu ne’e hato’o husi prezidente Konsellu Administrasaun Rádiu no Televizaun Timor-Leste, Empreza Públika-RTTL,ep, José António Belo ne’ebé partisipa mós iha enkontru entre Prezidente Repúblika José Ramos-Horta no ekipa Televizaun ABC ne’e hateten, televizaun ABC hakarak materializa kooperasaun ho RTTL no mídia sira iha Timor hafoin enkontru iha Palásiu Prezidensiál ( 17/11/2022).
“Ohin kolega sira mai informa ba Prezidente-da-Repúblika saida mak sira sei halo atu apoiu mídia sira iha Timor-Leste liu-liu ba RTTL relasiona ho memorandu entendimentu ne’ebé maka sina ona entre RTTL ho ABC kona-ba troka kontíudu no hanorin English liu husi televizaun,” hateten, Prezidente RTTL, José Belo Kinta ( 17/11/2022.
José Belo salienta,.RTTL ho televizaun ABC sei asina akórdu kooperasaun iha área formasaun no kapasitasaun lian Ingles ba mídia sira iha Timor-Leste, inklui harii seksaun lian Ingles iha RTTL.
Sorin seluk, Lead International Development Public Affairs, Jo Elsom hateten, enkontru ho Xefe Estadu ne’e ko’alia liu kona-ba importánsia mídia no liberdade ba mídia nian, tanba mídia broadcasters nasional nia papel mak promove interese públiku nian nomos apoiu sidadaun sira atu asesu ba informasaun.
“Ami agradese tebes ho Prezidente. Ami ko’alia liga ba dezenvolvimentu mídia nian no oinsá atu servisu hamutuk mídia iha Timor hodi harii kapasidade no “skill” ho matenek ne’ebé ami iha, nomos ami sei aprende buat balun husi mídia iha Timor, nune’e bele kria relasaun iha lian jornalizmu,” tenik Jo.
Iha biban ne’e Lead International Development Public Affairs, Jo Elso no ekipa agradese ba Prezidente Repúblika, José Ramos-Horta bele disponibiliza tempu hodi hasoru malu ho ekipa televizaun ABC.
Jornalista : Rita Moniz
Editór : Agapito de Deus
