Ermera (Lafaek News)-Populasaun suku rua Urahou no Mau-ubo ne’ebé mak lokaliza iha postu administrativu Hatolia, munisípiu Ermera to’o agora seidauk senti Timor nia ukun a’an, tanba kontinua nakukun.
Kuaze pupulasaun husi suku Urahou no Mau-ubo sai preokupasaun boot tebes liu ba liña eletrisidade ne’ebé iha kompañia ilegal ruma lori sira nia materiál mak hanesan fiu ho besi riin sira mai so’e hela iha tinan 2016 to’o agora laiha prosesu nia kontinuasaun.
Tuir deklarasaun husi autoridade lokal nain rua suku Urahou no Mau-ubo ne’e katak, sira laiha koñesementu ba kompañia hirak ne’ebé mak atu mai dada eletrisidade, tanba ida-idak mak sukat.
Suku Urahou kompostu husi aldea neen no suku Mau-ubo iha aldeia haat ne’ebé durante populasaun suku rua ne’e nunka atu asesu ba eletrisidade, tanba sira konsidera katak governu mak halo diskriminasaun ba sira iha munisípiu Ermera.
Nune’e, Veteranus husi suku Urahou, Julio Monis ho kodiku “Tiru Hamrik” senti la senti Timor nia ukun a’an, tanba suku ne’e rasik to’o agora la hetan naroman hanesan suku sira seluk.
“Ami nia moris lor-loron mak moris ho de’it vida agrikultura, laiha servisu seluk mak ami halo, ami nia suku de’it mos bee moos laiha, liu-liu eletrisidade ne’ebé ami hotu preokupa, keta halo governu la haluha ami iha suku ne’e karik,” Preokupasaun ne’e hato’o husi Vetarnus Tiru Hamrik ba Lafaek News, Kuarta (28/10/2020) iha suku Urahou, Munisípiu Ermera.
Sorin seluk Xefe Suku Urahou, Alberto Soares mós preokupa liu ba liña eletrisidade, tanba durante ne’e ita esforsu no hato’o parte kompetente, maibé to’o seidauk iha rezultadu nafatin.
Tanba, populasaun iha suku ne’e sempre halerik liu ba liña eletrisidade, bee moos no estrada entaun ne’e, ita sempre hato’o ona ba Autoridade munisípiu Ermera nian, mais to’o laiha ekipa ida atu tun dereita haree suku Ura-hou ne’e rasik.
Hatan ba kestaun ne’e, Diretór Planeamentu Munisípiu Ermera, Constantino Exposto, los duni katak, suku Urahou no Mau-ubo to’o agora la asesu ba liña eletrisidade, tanba projeitu nasionál, entaun autoridade munisípiu Ermera mós laiha koñesementu.
Maibé, Autoridade munisípiu Ermera kontinua hein lamentasaun husi suku ne’ebé seidauk asesu ba liña eletrisidade, ne’e tanba saida mak to’o agora ahi seidauk tama hela de’it.
Tuir lolos kompeténsia Eletrisidade De Timor Leste (EDTL) nasionál sira mak tenke responde populasaun husi suku Urahou no Mau-ubu, tanba projeitu eletrisidade ne’e nasionál mak toma konta ba.
Tan ne’e, Autoridade munisípiu kontinua konfirma ho EDTL munisípiu atu bele hato’o hela ba EDTL nasionál hodi bele responde lalais preokupasaun ne’ebé hato’o direita ba mídia nasionál sira.
Observasaun lafaek news nian iha tareinu nota katak, komunidade sira to’o agora nunka asesu ba eletrisidade no prejudika tebes ba labarik sira nia futura, tanba tempu kalan ona ne’e, estudante sira susar atu estuda.
Nune’e, kuaze populasaun suku rua ne’e bisu-bisu dehan, ema hotu senti Timor nia ukun ona, maibé ami suku rua ne’e rasik seidauk senti Timor nia ukun a’an, tanba tempu kalan sempre nakukun hela de’it.
Jornalista : Floriano Soares
Editór : Devril Noe Fernandes
