Preokupasaun ne’e hato’o hosi Sekretáriu Suku Urahou, Belarmino de Jesus, ne’ebé deklara katak, uluk Eis Prezidente Repúblika (PR) Taur Matan Ruak no agora hanesan Primeiru Ministru (PM) no membru governu lubuk ida mak mai toba iha uma.

Tanba, membru Governu sira ne’e kuaze haree ho matan, katak suku Urahou mak fatin ne’ebé izoladu liu ona kompara ho suku sira seluk.

Maibé, to’o agora laiha Governu ida mak atu mak dada hela bee moos ruma hodi fornese mak komunidade sira ne’ebé durante tinan naruk nia laran moris de’it ho agrikultura.

Iha tempu udan hanesan ne’e, agrikultór barak mak aproveita udan been hodi bele rega ba sira nia modo nomos produtu seluk ne’ebé sira tutur de’it hodi asesu ba merkadu, no udan been balun utiliza nesesidade lor-loron nian.

“Ami nia vida moris mak hanesan toos nain, hakarak lakohi tenke tun ba toos hodi bele kuda netik buat ruma entaun presiza bee hodi rega atu bele hetan rezultadu diak, se bee laiha bele prejudika agrikultór sira,” dehan Sekretáriu Suku Ura-hou, Belarmino de Jesus ba Lafaek News iha suku Urahou, munisípiu Ermera, Tersa (27/10/2020).

Nia haktuir, maske ami moris vida agrikultura, maibé ami nia fuan boot atu halo atendementu ba sé de’it bele mai vizita iha suku Urahou, liu-liu membru Governu sira no deputadu sira, maibé to’o ami ho populasaun kontinua halerik nafatin ba bee moos, eletrisidade no estrada.

Sorin seluk Agrikultór husi suku Urahou, Lucas Lemos Pereira mós preokupa liu ba bee mos, tanba governu nunka atu tau matan, ami agrikultór ho komunidade sira mak dada rasik bee moos, maibé uza kadoras au mak dada, dala ruma aitaha monu taka tiha bee entaun la mai.

Tanba, bee ne’ebé dada mai ne’e dook liu husi suku ne’e rasik, maibé ne’e la uza ba atu rega modo, maibé uza nesesidade hanesan ten, haris no fase roupa, sé tempu bai-loron bee mai araska los.

Suku ne’e rasik to’o agora Governu seidauk mai halo instalasaun ba bee, tanba ami ezije hela de’it mós governu mak lakohi atu rona ami povu nia lian.

Nune’e mós, Xefe Suku Urahou, Roberto Soares, deklara, durante ne’e, agrikultór barak mak ezije bee, maibé ita labele halo buat ida, tanba ita laiha osan ho inisiativa rasik atu dada bee mai iha suku ne’e.

Hanesan Autoridade Lokal Urahou hato’o preokupasaun povu nian ba nasionál, maibé to’o agora laiha resposta asuntu ne’e.

Tan ne’e, mak autoridade lokal kontinua esforsu hodi halo konfirmasaun ho parte kompetente sira hodi bele responde lalais preokupasaun husi populasaun suku ne’e rasik.

“Ha’u rasik mós preokupa duni ba bee mós, tanba ami ne’e ladun asesu bee ho di’ak, hau rasik mós aproveita udan been hodi bele uza,” preokupa Xefe Suku Urahou.

Jornalista   : Floriano Soares 

Editór          : Devril Noe Fernandes