Lafaek News (Covalima)—Preukupasaun ne’e hato’o hosi Xefe Aldeia Lohorai, suku Matai postu administrative Maucatar, munisípiu Covalima, Jacinto Goveia Leite, husu ba Ministériu Obras Publika (MOP) atu hadia moru de protesaun ne’ebé hetan estragus, iha tempu udan durante loron tolu tu-tuir malu iha Covalima.
Autoridade lokal ne’e relata, situasaun provizoriu ba da-daun, rai no moru protesaun ne’e monu, tama hotu iha valeta laran hodi impede sirkulasaun bee iha tempu udan.
Jacinto preokupa, wainhira governu liu hosi MOP la toma atensaun ho urjente, bele akontese inundasaun iha bairu laran, tanba daudaun ne udan se’i kontinua mai.
“Udan boot, loron tolu ninia laran, nia estraga mos rai ho penahan, impaktu mós ba komunidade tanba rai taka hotu bee dalan no hamosu inundasaun, tan ne’e husu MOP iha tempu badak bele hadia lalais, husu mos ba PDM sira bele Ajuda ami,” nia hateten, Iha suku Matai, Kuarta (24/06)
Iha uma kain hamutuk 12 mak besik liu iha area akontesementu, husu kona-ba situasaun atual um.a kain hamutuk 12 ne’e oinsa? Xefe aldeia ne’e hatan, uma kain 12 ne’e di’ak hela, tanba rai ne’ebé monu la kona sira diretamente, tanba sira dook hosi foho ne’e ho distánsia 25 metru, enkuantu moru protesaun antes ne’e konstroi hosi PNDS, iha tinan 2024 no finaliza iha tinan 2025.
Iha fatin hanesan mos, Xefe Suku Matai, Nuno Jose M. Perreira rekonese katak, situasaun ne’e akontese duni, no Iha tempu badak sei hatoo ba parte governu atu toma atensaun.
“Informsaun ne’e hau simu ona husi xefe aldeia, ha’u orienta kedas ba xefe aldeia hodi halo kedas pedidu hodi hatama ba diresaun APC Ninian,” nia hateten.
Hanesan xefe suku, nia dehan, sei tuun ba baze hodi haree diretamenta kondisaun iha fatin refere no hamutuk ho APC bele normaliza fila fali, espesifikamente fo korazen ba komunidade sira.
“Liu-liu ba familia sira ne’ebé besik iha area risku ne, APC ninia papel maka oinsá informa ba komunidade sira bele hadook-Aan. sira mos bele halo koordenasaun ba parte obras publika,” Nia hakotu.
Jornalista Covalima : Venidora Oliveira
