Lafaek News–Konsellu Imprensa Timor-Leste (CI-TL) realiza formasaun hakerek feature ba jornalista na’in 19 husi média eletrónika, online no imprensa atu hasa’e sira-nia abilidade iha produsaun notísia interpretativu. Formasaun ne’e hala’o iha sede CI-TL, Dili, no sai parte husi faze daruak série treinamentu ne’ebé CI-TL prepara ba jornalista sira iha territóriu nasionál.
Prezidente Interina CI-TL, Suzana Cardoso, hatete katak objetivu formasaun ne’e atu hasa’e kapasidade jornalista tanba to’o agora hakerek feature seidauk barak no balun la tuir estrutura no konteúdu ne’ebé loos.
“Formasaun ida ne’e realiza atu fó koñesimentu kona-ba hakerek feature. Ami hakarak jornalista na’in 19 ne’ebé reprezenta média sira bele implementa iha sira-nia fatin servisu,” dehan Suzana ba jornalista sira iha CI-TL Kintal boot, Dili, 12/06/2026.
Suzana esplika katak profisaun jornalista la’ós de’it atu hakerek notísia hard news kona-ba serimónia ka asuntu formál sira. Produsaun soft news ka feature mós importante tanba bele fó inspirasaun no motivasaun ba dezenvolvimentu Timor-Leste ne’ebé hela iha faze konstrusaun.
“Feature mak tipu hakerek ida ne’ebé tenki klaru, interesante no bele lori motivasaun ba públiku liuhosi istória, situasaun ka ezemplu pozitivu sira ne’ebé suporta progresu no dezenvolvimentu,” nia esplika.
Nia husu ba partisipante sira atu kontinua aprende rasik maski tempu formasaun badak. “Iha era dijitál agora ita-boot sira bele kontinua aprende rasik no aprofunda liu tan koñesimentu ne’ebé hetan ona,” dehan Suzana.
Suzana rekoñese katak jornalista balun sei hasoru difikuldade iha utilizasaun lian Inglés, Portugés no Indonéziu. Maibé nia dehan, agora iha ona ferrramenta tradusaun dijitál hanesan Google Translate ne’ebé bele ajuda jornalista sira hakerek no komprende informasaun ho di’ak liu.
Iha fatin hanesan Jornalista husi http://Hatutan.com, Juvinal Cabral dos Santos, apresia formasaun ne’e tanba fó benefísiu bo’ot ba jornalista sira.
“Durante ne’e ami foti de’it ema nia ko’alia. Maibé husi formasaun ne’e ami aprende katak ami labele foti de’it isu ne’ebé fontes ko’alia ba ita. Ami mós presiza halo observasaun ba situasaun real no tenki bazeia ba dadus no faktus,” dehan Juvinal.
Nia hatutan katak métodu feature balun hanesan investigativu husu jornalista atu buka klean liu kona-ba asuntu ida, observa situasaun real no identifika problema ka faktu sira ne’ebé relevante ba públiku.
“Formasaun ne’e importante tanba ami aprende estrutura feature, oinsá hakerek títulu ne’ebé atrativu no oinsá konta ema ida-nia istória atu leitor sira mos sente interese atu lee,” nia hatutan.
Formasaun ne’e partisipa husi jornalista na’in 19 husi média 19 hanesan Tatoli, IP, GMN, http://Hatutan.com, Independente, Lafaek News, Dili Post, SAP News, Loluwari, Lian Orluli, Média Demokrasia, Timor Post, Média Mudansa, GR-TV, Média One Timor, VIP, no Radio Liberdade.
Tuir planu CI-TL, sei iha tan formasaun kona-ba editorial, verifikasaun faktu, feature ba televizaun, formasaun ba proprietáriu média sira no área justisa. Programa sei kontinua to’o fulan Setembru 2026.
CI-TL espera katak iha futuru jornalista sira la’ós de’it sai hanesan transmisaun informasaun, maibé mós bele sai autor livru, peskizador no formador ne’ebé kontribui ba dezenvolvimentu setór jornaliztiku iha Timor-Leste.
Jornalista: Moises Guterres
