Lafaek News—Asosiasaun Akadémika Estudantil Fakuldade Edukasaun no Humanidades (AAE-FEH), iha Universidade Nasionál Timor-Lorosae hamutuk ho estudantes departamentu fízika ezije dekanu FEH, rezolve prátika pedagojia 2 ne’ebé akontese iha departamentu fízika.
Portavóz AAE-FEH, Romario Mali Alves Leite, hateten katak estudante barak hetan impedimentu husi Diretora Departamentu Fízika, nune’e la konsege tuir pratika pedagojia 2 no estajiu ne’ebé nu’udar komponente prinsipál iha kurikulu akademiku.
“Estajiu ne’e mós direitu ida estudante sira nian ho objetivu atu pratika ba teoria sira ne’ebé be durante ne’e estudante sira aprende ona hodi bele hasa’e koñesimentu estudante sira nian atu bele garante kualidade edukasaun,” dehan Romario ba jornalista sira iha Kampus Liceu, 11/06/2026.
Romario hatutan katak problema ne’ebé AAE-FEH identifika mak alegasaun falsifikasaun notas estudante sira nian, estudante sira nia valor la tama sistema, no impede estudante sira estajiu
“Estrutura departamentu, liu-liu Diretora, tenta halo falsifikasaun notas estudante sira ne’ebé atu tuir pratika pedagojia 2; Estudante balun ne’ebé liu ona disiplina maibé bainhira públika naran, kreditu aumenta to’o haat no lima; Estudante sira kumpri ona dever tuir aula no exame, maibé valor kontinua la iha administrasaun, nune’e prezudika atu tuir pratika pedagojia 2; no Diretora departamentu impede estudante na’in 25 atu tuir estajiu,” portavoz tenik.
nia haktuir, nia parte halo ona konsultasaun ho estrutura fakuldade no departamentu, maibé la hetan solusaun, Estrutura fakuldade no estrutura departamentu kontra desizaun, signifika diretora departamentu fízika uza nia ignoránsia no arogansia lakohi obedese ba dezisaun fakuldade nian.
Iha 01 Juñu 2026, reprezentante estudante sira hasoru Vise Dekanu Asuntu Akadémiku, nia dehan katak, regulamentu akademiku UNTL la limita estudante atu hala’o prátika pedagojia 2, tanba ida-ne’e ezijénsia husi kuríkulu ECTS ne’ebé UNTL uza daudaun. Maibé iha Departamentu fízika, diretora uza nia poder hodi limita estudante na’in 25, labele ba kompleta estudu refere, signifika diretora la konkorda ho regulamentu akadémiku ne’ebé UNTL iha no viola sistema ECTS ne’ebe ohin loron UNTL Adota,” dehan Romario.
Portavóz ne’e mós akresenta katak bainhira hasoru direta ho diretora, nia rasik dehan la Lee estatutu no la hatene, ho situasaun ne’e, AAE-FEH husu Dekanu FEH atu rezolve imediata problema nune’e estudante departamentu fízika hamutuk na’in 62 bele tuir prátika pedagojia.
“Husu dekanu FEH tau atensaun másimu ba diretor departamentu no administrasaun departamentu 10, liuliu departamentu fízika, atu labele repete aktu inmoral no inkapasidade sira ne’e. Ami husu mós Magnifiku Reitór atu tun halo fiskalizasaun bei-beik hodi evita hahalok ne’ebé intensaun atu hamonu no estraga dignidade UNTL nian iha públiku,” estudante AAE-FEH, Romario husu.
Estudante ne’e subliña katak sira nu’udar reprezentante estudante iha FEH iha dever atu defende direitu no interese estudante sira nian, hodi kumpre misaun UNTL nu’udar instituisaun públika ba ensinu superiór iha Timor-Leste ho motto “matenek no lia loos”.
“Se estrutura departamentu no fakuldade inklui universidade tenta ignora iha loron tolu nia laran, ami estudante UNTL sei halo asaun pasífika hasoru estrutura fakuldade hodi blokeia espasu no posibilidade to’o estrutura universidade,” Nia alerta.
Jornalista: Ekipa Lafaek News
