Lafaek News—Fiar katóliku husi parókia oi-oin iha Arquidiocese Díli partisipa iha prosesaun Corpo de Cristo ne’ebé hahú husi Igreja Imaculada Conceição Balide no remata iha Lecidere no prosesaun relijioza ne’e la’o ho dame no orden tanba hetan apoiu husi Polícia Nacional Timor-Leste ne’ebé distribui membru sira iha pontu importante sira hodi asegura durante atividade la’o ho di’ak.
Observasaun jerál ekipa Lafaek News, dezde oras dadeer, fiéis sira husi parókia oi-oin hahú halibur-an iha Igreja Balide, ho bandeira relijioza, imajen santu sira no simbolu Igreja nian, partisipante sira prepara-an atu tuir prosesaun ne’ebé konsidera hanesan ida husi selebrasaun relijioza importante liu ba komunidade katólika iha Timor-Leste.
Atmosfera iha fatin hahú prosesaun nian nakonu ho sentidu espirituál, labarik sira, jovem, inan-aman no katuas-ferik sira hamutuk iha laran ida deit atu selebra Corpus Christo, festa ida ne’ebé Igreja Katólika dedika ba adorasaun no respeitu ba Santíssimu Sakramentu.
Bainhira prosesaun hahú la’o, estrada sira iha kapital Dili sai nakonu ho ema ne’ebé tuir atividade ne’e, kanta relijioza no orasaun sira rona durante dalan tomak, hodi hamosu atmosfera hakmatek no solene, bandeira parókia oi-oin ne’ebé aas iha leten mos sai atraksaun boot ida ba komunidade sira ne’ebé hamriik iha beira estrada.
Partisipasaun husi fiéis husi parókia oioin hatudu forteza Igreja Katólika iha Timor-Leste. Maski mai husi área no komunidade diferente, sira hamutuk iha objetivu ida deit, mak atu hatudu sira nia fé no devoasaun ba Kristu.
Durante prosesaun, komunidade barak hamriik iha beira estrada atu haree no fó apoiu ba peregrinu sira. Balun halo sina kruz bainhira prosesaun liu, balun halo orasaun, no balun aproveita atu dokumenta momentu ne’e liu husi fotografia no vídeo.
Presensa PNTL durante atividade ne’e ajuda tebes atu garante seguransa no fluidez tráfiku. Membru polísia sira organiza movimentu kareta no motorizada sira iha estrada atu evita perturbasaun ba prosesaun. To’o atividade remata, la iha relatóriu kona-ba insidente boot ruma.
Ba Igreja Katólika, Corpus Christo la’ós de’it selebrasaun relijioza ordináriu ida, festa ne’e iha signifikadu espirituál boot tanba fó oportunidade ba fiéis sira atu hatudu publikamente sira nia fé iha prezensa Kristu iha Eukaristia, tanba ne’e, tinan-tinan atividade ne’e sempre atrai partisipasaun husi sarani barak husi parókia oi-oin.
Observadór jornalista Lafaek News, observa katak selebrasaun tinan ida-ne’e demonstra unidade ne’ebé metin entre komunidade katólika sira. Partisipasaun husi jovem no labarik sira mos konsidera importante atu kontinua transmite valor fé no tradisaun Igreja nian ba jerasaun foun.
Ho remata prosesaun iha Lecidere, fiéis sira kontinua tuir programa relijiozu seluk ne’ebé organiza husi Igreja. Maski tempu manas, maioria partisipante sira hatudu entusiasmo no kontente tanba bele partisipa iha selebrasaun ne’ebé konsidera hanesan momentu espirituál importante ida ba sira.
Selebrasaun Corpus Christo tinan 2026 ne’e hatudu tan katak fé no unidade kontinua sai forsa importante ida iha moris komunidade katólika Timor-Leste nian. Ho partisipasaun milhares husi fiéis, apoiu husi parókia oioin no seguransa ne’ebé garante husi PNTL, prosesaun husi Balide to’o Lecidere lao ho susesu no sai testemunhu moris ida ba devoasaun povu katóliku Timor-Leste.
Jornalista Estajiadu : Marcos X. De Brito
