Lafaek News—Prezidente Fundasaun Sentru Treinamentu Vokasional Juventude, António Sepeda informa STVJ hahú hosi fundu kiik no independente hodi transforma abilidade ba joven sira iha setor turismu, hospitalidade inklui administrasaun publika.
Antonio hatoo asuntu ne’e ba jornalista Lafaek News iha Kuarta feira, 22 Abril 2026, iha nia kna’ar fatin STVJ Comoro, hodi dehan maske iha fundu kiik maibé kontinua kapasita joven sira abilidade hodi kontribui ba prosesu dezenvolvimentu iha Timor Leste.
“Problema ne’ebe STVJ hasoru hanesan bareira bo’ot liu-liu iha fundus tamba STVJ ne’e indepedente entaun tenke buka meius hodi hetan gran ruma ne’ebe fo sai husi governu ka husi NGO sira ba iha formasaun sira entaun STVJ sira prepara hodi hanorin. Se la hetan gran ruma, entaun halo small business hanesan fo aluga salaun ba ema , no ba formasaun short time sira maka USA ba fundu STVJ rasik. Ami la iha doador permanente entaun ba fasilidade ami sei uza dometika ne’ebe iha maske balance hare’e hanesan modernu maibe seidauk tamba padraun industria ninian. Ita hakarak utiliza ekipamentu modernu maibe depende fali ba finanseiru,”Prezidente STVJ Comoro, António Sepeda.
STVJ iha area formasaun total 17 ne’ebe hetan akreditasaun nasional husi INDIMO, iha area administrasaun ho nia ramu, inklui hospitalidade, formasaun ba formador no tuir planu iha tempu badak STVJ sei fo formasaun kona-ba nesesidade ema nian.
Fundador ne’e afirma STVJ forma ema barak, ema ne’ebe asesu sertifikadu ida ne’e bele ba servisu iha rai liur hanesan iha japaun no Australia, STVJ nia rekursu barak mak servisu iha kafetaria sira iha Timor.
“Iha 2025 to’o mai inisiu 2026, ami fo gradua ema nain atus rua(200) husi sertikadu ida to’o haat entaun sertifikadu Ida no rua ba administrasaun públika ho nia ramu oioin no ba turizmu hospitalidade mós hanesan, sertifikadu 3 no 4 ba formandu sira i alende ne’e mós iha kursu badak ba kafé ninian entaun sertifika barista hamutuk nain 80, “formador ne’e tenik
Formasaun iha durasaun Fulan 6 no iha mós tinan ida ba administrasaun públika. Sertikadu ema nain 200 ne’e husi STVJ Comoro inklui STVJ 3 ne’ebe lokaliza iha Camea, Bairopite no Gleno.
“Ami nia esperansa mak laos deit sentru formasaun kiik oan maibe ami hakarak sai sentru ka institutu boot liu tan hodi hasae ema nia abilidade, koñesementu, atitude ba iha turizmu hospitalidade diak liu tan tamba atu iha retornu neebe mak diak ba nasaun ida nee area turizmu hospitalidade mos area ne’ebe boot tebes alende rekursu narural hanesan Mina entaun Ami nia mehi eleva liu tan ema nia konesementu abilidade ba area ida nee,” António Sepeda hakotu
Jornalista: Gracia Soares
