Lafaek News-Segunda-feira, 21 abril 2026 ne’e Prezidente Konsellu Administrasaun Aeroportu no Navegasasaun Area Timor-Leste, Empreza Públika informa ba jornalista sira katak iha tinan 2025 hetan reseitas ho montante dolar amerikanu $3.278.573. Ho montante barak liu husi aeroportu tax.
“Reseitas ladún barak maibé sufisiente reseitas totál ba tinan 2025 nian hamutuk três milhoens i tal ne’e mai husi landing ne’e, airport tax, aluger espasu sira ne’ebé kompañia sira aluga hodi loke sira nia atividade iha ne’e, ba airline sira, seluk mak ema halo iklan sira iha ne’e mós selu hotu, estesionamentu ne’ebé agora dadauk ami aplika ba motor karreta sira ida ne’e mós fas parte hotu reseitas ba AANATL tinan-tinan nian,”Prezidente Konsellu Administrasaun Aeroportu no Navegasasaun Area Timor-Leste, Empreza Públika, Romaldo António Soares da Silva ba jornalista sira iha nia edifisiu AANATL Aeroportu Internasional Nicolau Lobato Comoro Dili, 21/04.
Tuir nia, reseitas ne’e sufisiente atu bele oinsá ajusta netik orsamentu AANATL nian atu bele halo atividade rutina nian.
“Reseitas ne’ebé tama barak liu mai husi airport tax ita hatene tanba lorloron pasajeirus sai tanba tenke selu $10 kada ema, aviaun agora movimentu di’ak oituan hanesan Aero Dili, Citilink, Qantas mai husi Austrália, Airnoth husi Austrália no mós Batik Aero husi Malázia, aviaun sira ne’e semo movimentu mai iha ne’e la’ós de’it taxa ba pasajeirus sira no airport tax mai mós landing fee,” dehan Prezidente AANATL.
Ekuantu nia dehan ho totál husi reseitas ne’e barak liu husi airport tax ho landing fee, ho aeroportu ho kondisaun ne’e mak AANATL labele aplika reseitas sira ne’e mak sinál.
“Espera ba iha 2028 se aeroportu ne’e foun inagura duni iha 2028 ami sei revizaun fila fali ami nia tabela aluger buat sira ne’e hotu ami hanoin reseitas 2029 ba oin bele aumenta kada tinan,” Nia hakotu.
Jornalista: Gracia Soares
