Balibo (Lafaek News)— Autoridade Postu administrativu Balibo, administrador Casímiro dos Santos, espresa sentimentu orgullu ba Sekretaria Estadu Komuikasaun Sosial no Konsellu Imprensa, ne’ebé kada tinan komemora loron trajedia Balibo Five, iha ne’ebé jornalista nain 5 mate tanba defende lia-loos.
“Sente orgullu tamba Komemorasaun tinan 50 trajédia Balibo Five ne’ebe hafanu itá relembra fila fali Jornalista Nain 5 ne’ebe mak Mate iha Balibo Five iha 17 de Outubro de 1975, ha’u Senti orgullu tanba tinan-tinan Secretário Estado komunikasaun Sósial no mos Konselho de Imprensa Timor Leste sempre komemora loron Balibo Five Ni-nian,itá hotu Fo onra ba sira tamba sira luta ba lia-loos,” Casímiro dos Santos ba jornalista sira hafoin remata abertura feira Liberdade Balibo Five iha kampu Balibo, segunda (13/10/2025).
Jestor postu Balibo ne’e haktuir, molok komemorasaun Balibo Five ba-dala 50 ne’e realiza, antes ne’e SEKOMS ho KI realiza ona reuniaun ho autoridade postu Balibo, ohin hatudu rezultadu ne’ebé diak tebes, komunidade Balibo sente haksolok no sente katak loron ne’e nain ba Balibo-oan liu-liu populasaun munisípiu Bobonaro tomak.
“Kona-ba SEKOMS ami koopera malu ho diak tanba SEKOMS mos Oferese ona Rádio Komunidade Balibo Five ne’ebe ami asina ona kontratu loron hira liu ba agora da-daun finaliza ona konstrusaun ba Rádio ne’e no hein loron 15 sei halo inagurasaun ba fatin Rádio refere,” Administradór Balibo relata.
Ikus liu, observasaun administrador postu Balibo iha eventu komemorasaun Balibo Five la’o susesu, tanba kolaborasaun di’ak ho autoridade no komunidade tomak iha postu Balibo, tan ne’e hatoo apresiasaun boot ba SEKOMS no KI tanba bele iha kooperasaun ne’ebe diak ikus hatudu rezultadu ne’ebe diak iha tinan ida ne’e.
Kobertura : ekipa Lafaek News
