Lafaek News—Sekretariu Estadu Kooperativa (SEKoop), Arsénio Pereira hateten governu hakarak fasilia grupu produtor Maubisse atu bele hasa’e produsaun rasik hodi hetan rendimentu ba familia atu sustenta moris no oan sira nia eskola.
Arsénio Pereira hatoo asuntu ne’e hafoin vizita grupu agrikultor sira iha aldeia Hato-Luli, Suku Maubessi, Postu Administrativu Maubessi, Munisípiu Ainaru, hodi haree direta produsaun strobery no ai-funan ne’ebé sira (agrikultor) kuda iha suku refere.
“Ita hakarak grupu sira ne’e, ho ninia kreatividade sira hanesan ne’e atu mai haree, para depois hanesan governante no saida mak bele fasilita ba ita nia produtór sira bele produsaun tanba sira nia rendimentu hetan mai husi produsaun ne’ebé mak sira kuda rasik hodi sustentá sira nia família no sustenta sira nia moris,” nia dehan. Ohin ha’u ba sira nia to’os laran, sira hato’o mai primeiru sira mós hakarak hetan fasilidade ruma husi governu, no agora dadaun Ajénsia mak fasilita, maibé depois programa termina dala ruma sira ba tiha, entaun la iha ida mak akompaña ona produtór sira,” SEKoop Arsénio Pereira ba media Tour iha suku Maubisse, 12 08/2025.
Arsénio hateten, bazeia ba konvite ne’ebe husi Alumi Parlamento Foin-sa’e ne’ebe realiza iha Rabilau iha mos ajenda vizita joven produtor sira ne’ebe kuda produtu iha aldeia Hato-Luli suku Maubise postu admistrativu Maubisse atu bele haree difikuldade saida mak agrikultor sira hasoru.
“Ha’u nia vizita ne’e, ha’u kompri konvite ne’ebé husi Alumi Parlamentu Foinsa’e komvida atu mai partilla informasaun iha Rabilau.Maibé iha mós programa ida, mak vizita ba kampu ohin primeira vizita ba produsaun ai-funan fresku iha Maubisse, entaun ho ida ne’e segunda vizita mai haree produsaun Strowberry,” hateten Sekretáriu Estadu Kooperativa (Sekoop), Arsenio Pereira konfesa.
Governante ne’e kompromete katak, nia parte sente orgullu wainhira haree vontade hosi joven sira ninia produtividade kontribui ba kreximentu produsaun rai-laran, SEKoop sei fasilita atu sira bele hala’o servisu ho di’ak liután.
“Iha parte governu liu-liu iha SEKoop ita muda ita nia estratéjia ba grupo sira ne’ebé maka eziste iha ne’e, kuandu programa husi Ajénsia fasilita termina ita bele fasilita bele sira sai kooperativa ida. Tanba iha propriu estatutu ba iha kooperativa ke substavel, tanba sira iha mós estatutu rasik ne’e sira bele ba resgitu legalidade iha notariado, “nia esplika.
Iha fatin hanesan, Xefe Grupo Haburas Maubisse, Domingos Eustachius Lourdes haktuir, produtu ne’ebé kuda ba rai ne’e hahu husi tinan 2016 no hetan ona apoiu husi USAID, maibe tinan rua liu ba ho mudansa Klimátika fo impaktu bo’ot ba produtu hirak hanesan Strawberry ho modo, maibé grupu produsaun la lakon vontade atu kontinua kuda.
“Produsaun Strawberry hahú kedas iha 2016 bainhira ita hetan apoiu husi Ajénsia USAID, liu husi avansa agrikultura to’o mai ohin loron produsaun Strawberry maske iha tinan ida ka rua liu ba, ita iha mudansa klimatika halo ami nia produsaun menus, maibé ida ne’e la hamate to’os na’in sira-nia vontade atu kontínua produsaun, vizita husi SEKoop hanesan primeiru mai iha ami nia grupu hanesan toos na’in ita kontenti tebes, vizita ida ne’e hanesan governu to’o direta mai ita to’os na’in sira nia fatin, saida mak ita halo iha ita nia fatin no dezafiu saida mak ita hasoru durante ne’e,” nia Konklui.
Entretantu, Strowberry ne’ebé grupu Haburas Maubisse kuda iha apoiu hosi parte rua, ida hetan apoiu husi Ajénsia United State Amérika (USAID), husi California no ida husi nasaun Indonézia, hahú husi 2019 to’o mai agora sira suplay ba iha Merkadu sira iha Dili laran hanesan WFour, Dili Mark, no grupu Haburas Maubisse, iha membru na’in 19 kompostu husi foinsa’e no inan-aman sira ne’ebe hadomi agrikultura.
Jornalista : Maria Jose de Jesus
