Lafaek News—Primeiru Ministru IX Governu Konstitusional, Kay Rala Xanana Gusmão, reafirma rekoñese kontribuisaun feto nian ba luta ukun rasik an importante tebes.
Xefe governu hatoo asuntu ne’e iha komemorasaun loron internasional feto ba tinan ne’e iha salaun Delta Nova, hodi dehan tenke selebra duni loron feto nudar rekonesimentu no reflesaun atu hanoin hikas feto sira luta no kontribuisaun ba libertasaun nasional iha aspeitu dezenvolvimentu, ekonomia lideransa no igualidade zénero ba feto no labarik.
“Selebrasaun loron international ba feto sira nia kontribuisaun ba dezenvolvimentu sustentavel no oinsa atu asegura diretu Ekonomia no lideransa inklui igualidade zénero ba feto no labarik iha moris lorloron,” Kay Rala Xanana Gusmão afirma.
Iha okaziaun ne’e, Xefe Governu ne’e husu ba parte hotu servisu hamutuk hodi halakon dezigualidade no diskriminasaun no forma violénsia oi-oin ne’ebé kontinua akontese iha Timor-Leste.
Iha fatin hanesan, Prezidente GMPTL, Aliansa da Conceição de Araújo intensaun fundamentu husi komemorasaun loron international feto atu omenajen no hanoin hikas feto sira ne’ebé sakrafisiu sira nia an iha luta ba hasoru inimigu ne’ebé halo violénsia no torturasaun iha tempu difisil hodi manan Timor Leste hosi liman kroat sira liman.
“Aproveita iha biban iha ne’e fo homenagen ba feto maluk Timor-oan sira ne’ebé sakrifika sira nia-an iha luta ba independénsia hasoru violénsia torturasaun ho inklui feto maluk sira ne’ebé hasoru konflitu oi-oin iha nasaun barak,” Aliansa da Conceição de Araújo sublina.
Prezidente GMPTL ne’e argumenta, komemorasaun loron feto ne’e atu refleta no konkista dezafiu sira ne’ebé feto maluk sira kontinua luta hasoru iha sira nia moris loro-loron.
Entretantu iha selebrasaun loron intenasional ba feto ne’e hetan partisipasaun husi Primeiru Ministru Kay Rala Xanana Gusmão, Prezidente Parlamanetu Nasional, Fernanda Lay, reprezentante membru Governo, sosiedade sivil, Militares, Reliziozus, PAM munisipiu Dili, ho membro Grupo das Mulheres Parlamentares Timor-Leste GMPTL .
Jornalista Magan : Fátima Sarmento das Dores
Editor : Agapito de Deus
