Lafaek News—Asosiasaun Jornalista de Timor Leste (AJTL) nia parseiu Oxfam iha Timor Leste, realiza tan media tour iha tinan ne’e liga liu ba asuntu mudansa klimátika iha suku Bobometo, sub-rejiaun Oesilo, Rejiaun Administrativu Especial Oe-Cusse.
Prezidenti AJTL, Maria Zevonia, esplika ligadu ho media tour ne’ebé sei hala’o iha Oesilo AJTL-OXFAM identifika ona asuntu ne’ebé ligadu ho Mudansa Klimátika no asuntu justisa klimátika ho problema hirak ne’ebé komunidade sira hasoru liliu feto no Ema ho difisiénsia inklui grupu vulerável sira seluk hasoru liu husi kazu mudansa klimátika.
“Liu husi media brefing ne’ebé Oxfam halo Ita identifika asuntu ne’ebé liga ho problema Mudansa klimátika no mos oinsá haree asuntu justisa klimátika ba iha problema feto no Ema ho difisensia grupu vuleravel sira seluk hasoru,” Zevonia sublina.
Asuntu ne’ebé identifika ona atu halo kobertura liu husi media tour ne’e hanesan krize bee mos, wainhira bailoron naruk, hahalok ema nian ne’ebé ladun halo protesaun ba Ambiente sunu rai, tesi ai arbiru, fo impaktu ba komunidade agrikultores sira iha area rural.
Tan ne’e, programa Media Tour ne’e importante tebes, lori jornalista nasional sira tuun ba iha baze nune’e bele hakerek notisia ba asuntu importante sira hanesan, edukasaun, saúde no agrikultura, ne’ebé afeta direta husi mudansa klimátika.
Iha Sorin seluk representante OXFAM, Adilson da Costa junior, reforsa servisu ne’ebé AJTL halo liu husi servisu kolaborasaun ho Oxfam de Timor Leste, programa media tour la’ós foin akontese, maibé halo dezde tinan rua ou tolu liu ba no kontinua servisu hamutuk hodi lori jornalista sira ba baze hodi halo kobertura ba informasaun sira ne’ebé dalabarak ladun hetan kobertura husi jornalista sira.
“Programa ne’e halo dezde tinan rua ou tolu liu ba no AJTL ho OXFAM servisu hamutuk hodi lori joranllista ba baze atu halo kobertura ba informasaun sira ne’ebé dalabarak ladún hetan kobertura husi media sira, entaun projetu ida ne’e apoiu husi oxfam honkong média ba mudansa klimátika ida ne’e hanesan projetu ne’ebé foca barak liu ba oinsá mudansa klimátika ba komunidade sira liuliu ba maluk sira ne’ebé mak vunerabel hanesan feto ema ho didisensia hetan krizi makas husi mudansa klimátika ne rasik,”Adilson salienta.
Entretantu programa media tour iha RAEOA 2025, Oxfam de Timor-Leste ho AJTL servisu hamutuk realiza ona media tour kona-ba mudansa klimátika iha munisípiu tol hanesan kompostu husi Lautém, Baucau, Ermera no ikus iha Oe-Cusse.
Jornalista : Felix Fernandes
Editor : Agapito de Deus
