Lafaek News—Prezidente Repúblika José Ramos-Horta, hala’o vizita ba Defensória Públika Balide, hodi haree direta servisu Defensór Públiku no haree mos infraestrutura edefisiu Defensoria Publika iha ne’ebé governu trata hanesan ema oan kiak.
“Ha’u sei ko’alia ho maun boot Primeiru Ministru, ko’alia Embaixadór sira para oinsá bele halo esforsu boot hadi’a infra-estrutura, mobilidade dignidade sira nia importa ha’u apoiu formasaun tékniku profesional para sira bele kada vez ho konesementu klean liu ba área justisa, Ha’u hanesan triste haree iha tinan 20 nia laran Defensória Públika kontinua hanesan oan kiak, Estadu nia instituisaun hanesan Estadu nian, maibé Estadu trata hanesan oan kiak familia sira soe tiha iha luron,”dehan Xefe Estadu José Ramos-Horta ba jornalista sira hafoin vizita edefisiu Defensoria publika Balide Dili, Sesta (23/02/2024).
Ramos-Horta haktuir, nasaun barak iha mundu admira ho sistema demokrasia iha Timor-Leste, tamba trata ema hotu hanesan hodi asesu ba justisa liuhosi Defensória Públika nia asisténsia.
“Fatin ne’e Balide bolu Defensória Públika, infelizmente sentru laran ne’e Governu nunka hadi’a, haree Defensória Públika hanesan instituisaun Prokuradoria Jerál Repúblika, hanesan Tribunál,” Horta haktuir.
Defensória Públika hanesan instituisaun Estadu ne’ebé tau matan no defeza ba direitu sidadaun sira nian, liu-liu ba sidadaun ne’ebé laiha kbi’it atu hetan advogadu.
Jornalista : Epifania I. Pinto
Editór : Agapito de Deus
