Lafaek News—Prezidente Repúblika José Ramos Horta hala’o vizita ba Ministériu Edukasaun Vila-Verde Díli, Sesta-Feira (23/02/2024) hodi diskute kona-bá problema ne’ebé setór edukasaun enfrenta iha Timor-Leste.
Iha vizita ne’e, simu direta husi Ministra Edukasaun, Dulcia de Jesus no Sekretáriu Estadu Ensinu Sekundáriu Jerál no Ensinu Sekundáriu Tékniku Vokasionál, Domingos Lopes Lemos.
Xefe Estadu José Ramos Horta hateten, setór edukasaun sai xave importante ba dezenvolvimentu nasaun, tanba ne’e governu tenke halo investimentu boot ba area edukasaun.
“Edukasaun setór ida ke i bele hateten númeru um iha kada nasaun, kada país númeru um iha Timor-Leste. Tanba ne’e investimentu boot ba futuru ho reforma,” dehan José Ramos-Horta.
Prezidente Repúblika hateten, sira ne’ebé la kontente sei haree, komprende sei simu sempre difisil rai hotu-hotu iha mundu liu-liu terseiru mundu, setór edukasaun ema barak, alunus rihun ba rihun, atus ba atus, Iha Timor-Leste ministériu ida ne’ebé tau matan ba estudante ba ita-nia populasaun joven no profesór seidauk sufisiente no kualidade, ema númeru ida iha TL ne’e mós apoiu polítika Governu nian hodi halo reforma ba setór edukasaun.
“Portantu apoiu ba señora ministra para kontinua prosesu reforma ida, modernizasaun importante tebes, ho ida-ne’e obrigasaun ba futuru rai ida ne’e edukasaun tenke la’o di’ak, programa ba rezidénsia ba profesór sira ne’e mós importante, rezidénsia ba enferméiru sira, ba médiku sira, maibé prontu nafatin ita la’o neneik,”” Ramos-Horta tenik.
Horta mós preokupa ho kondisaun ne’ebé manorin sira iha área remotas enfrenta, tanba ne’e husu Governu atu tau prioridade mós ba bem estar manorin sira nian.
Jornalista : Epifania I. Pinto
Editor : Agapito de Deus