Lafaek News—Koordenadora Grupu Traballu Reforma Setór Justisa, Lúcia Lobato ho ekipa atualiza ba Prezidente Repúblika (PR) José Ramos-Horta kona-bá servisu sira ba reforma setór justisa iha Timor-Leste.
Durante reuniaun, Xefe Estadu husu nafatin ba Grupu ne’e atu servisu maka’as no lalais hodi halo reforma ba sistema justisa iha TL.
“Prezidente Repúblika ko’alia sasán barak, apoia atividade ne’ebé mak ami halo. Husu katak tenke servisu lalais tanba setór ne’e presiza duni reforsu halo nusa mak Estadu tomak halibur hamutuk hodi hadi’a setór justisa,” informa Lúcia Lobato, iha Palásiu Prezidensiál Bairo-Pité Díli, Kuarta-Feira, (21/02/2024).
Eis-Ministra Justisa ne’e dehan, Programa Nasaun Unidas ba Dezenvolvimentu (PNUD) mós apoiu servisu Grupu Traballu Reforma Setór Justisa, liuhosi rekruta péritu iha área justisa nian husi Portugál.
“Ekipa espesialista ne’ebé UNDP ajuda ita mai apoia ekipa de traballu reforma da justisa iha semana kotuk,” katak Lúcia Lobato.
Koordenadora ne’e garante, iha fulan-Marsu, sei hato’o fila-fali ba Prezidente no rezultadu sira ne’ebé mak ami halo no relatóriu ikus ne’ebé mak fó ba Governu atu halo nusa mak ajuda Governu reforma setór justisa.
Grupu Traballu Reforma Setór Justisa mós sei aranka ba Baucau hodi hala’o enkontru ho juíz, prokuradór no defensór públiku sira.
Hatan kona-bá servisu ne’ebé ekipa halo, Lúcia Lobato afirma, grupu traballu ne’e efetivamente foin hahú servisu iha fulan-janeiru, tanba PM nomeia ha’u iha Agostu, hafoin MJ tama servisu los iha Setembru, Outubru, Novembru no Dezembru.
“Ita halo hela diagnóstiku ida iha ita-nia setór da justisa baseia mós informasaun hotu ne’ebé ita iha dokumentasaun ne’ebé mak ita rekolla,” tenik nia.
Reforma Setór Justisa ne’e, la’os Governu mesak mak servisu, maibé parte hotu-hotu hanesan, juíz, prokuradór, defensór sira inklui sosiedade sivil no grupu emprezáriu internasionál.
Setór Justisa importante tebes ba dezenvolvimentu nasionál, tanba setór justisa la’ó di’ak, bele kria kondisaun ba investidor sira mai investe iha TL.
“Justisa ida ne’ebe ke kria kondisaun, ita bele hetan investimentu barak atu bele hamosu kampu de traballu, investidór mai investe, sira hakarak garantia iha justisa, ha’u sei fila mai ita-boot sira ho programa konkreta ba reforma kurtu prazu nian, médiu prazu nian no longu prazu nian,” Lucia Lobato hakotu.
Jornalista : Epifania I. Pinto
Editor : Agapito de Deus
