Lafaek News—Embaixada Estadus Unidus Amérika (EUA) iha Timor Leste, reprezenta husi Diretór Interinu Misaun USAID, Mark Anthony White hamutuk ho Vise-Primeiru-Ministru, Ministru Koordenadór Asuntus Sosiais no Ministru Dezenvolvimentu Rural no Abitasaun Komunitária, Mariano Assanami Sabino Lopes lansa plataforma E-learning ba organizasaun sosiedade sívil sira iha Timor-Leste.
Plataforma ne’e, FONGTIL mak sei tau matan ho apoiu tékniku no finanseiru hosi Governu Estadus Unidus Amérika, no intensaun husi sentru aprendizajen online foun ne’ebé mak lansa ne’e, dezefia ho estratejia atu hametin interkámbiu informasaun, koordenasaun, kapasitasaun no advokasia entre ONG sira ho sspasu sentralizadu no interativu atu fó kbi’it ba FONGTIL hanesan organizasaun ne’ebé mak halibur ONG 270, inklui Rede ba Saúde Timor-Leste (REBAS-TL) ho membru 13.
Mark Anthony White, fundamaneta katak plataforma ne’e oferese kontéudu E-learning kona-bá tópiku sira hanesan jestaun finanseira, crowdsourcing, interkámbiu informasaun, peskiza no instrumentu advokasia atu fasilita diziminasaun informasaun, optimiza alokasaun rekursu, jere kalendariu no eventu sira, no enkoraja oportunidade ba parseria, estratéjia atu fahe informasaun, no kolaborasaun
“Liuhusi lansamentu ba inisiativa transformativu ida-ne’e, Estadus Unidus afirma fila-fali ninia kompromisu ba Timor-Leste nia dezenvolvimentu,” hateten Diretur Interinu Misaun USAID, Mark Anthony White, iha Díli, Segunda-Feira, (22/01/2024).
Lansamentu plataforma e-learning ne’e aliña ho USAID nia atividade ba Sustentabilidade Sistema Saude hodi apoia involvimentu síviku no advokasia hodi haforsa sistema saúde no USAID/Timor-Leste Nia atividade ONG, advokasia ba governasaun di’ak hodi fó apoiu esensial ba kria ambiente ida-ne’ebé diak hodi fasilita ONG sira no hasa’e sira-nia kapasidade atu fornese servisu advokasia ne’ebé bazeia ba evidénsia no sustentavel ne’ebé reprezenta lian sidaudaun sira nian.
“Hodi Organizasaun Sosiedade Sivil Timor-Leste nian naran, ha’u hato’o ha’u-nia sinseru agradesimentu ba Governu Estadus Unidus tanba apoiu tékniku no finanseiru ne’ebé boot tebes ba lansamentu plataforma e-learning FONGTIL nian ne’e,” dehan Diretor Ezekutivu FONGTIL, Valentim da Costa Pinto.
Visé-Primeiru Ministru, Mariano Assanami Sabino konsidera katak, lansamentu plataforma ne’e importante tebes ba ONG sira iha TL, hodi halo advokasia ba setór importante sira hanesan, saúde, edukasaun, agrikultura no seluk tan.
“Lansamentu ba plataforma ida ne’e importante tebes para atu fó kapasitasaun ita ida-idak, fahe informasaun, fó kapasitasaun, halo ko’ordenasaun ida di’ak liu tan e bele reforsa liu tan ita nia advokasia ba iha área oi-oin,” konsidera Visé-PM Assanami.
Nia dehan, liu-hosi USAID, Misaun EUA ba Timor-Leste kontribui ona besik millaun $92 entre tinan 2021 no tinan 2025, hodi hametin ekonomia Timor-Leste nian no promove governasaun di’ak.
Dezde Timor-Leste nia independénsia, USAID kontribui ona millaun $323 resin, hodi promove dezenvolvimentu inkluzivu no pasifiku ba Timor-Leste ida-ne’ebé prósperu, saudavel no autosufisiente.
Jornalista : Epifania I. Pinto
Editor : Agapito de Deus
